Yunanıstanda yanğın həyəcanı – Bir neçə bölgə alov içində
Yunanıstanın müxtəlif bölgələrində meşəlik və otluq ərazilərdə yanğınlar baş verib.
Crossmedia.az Anadolu Ajansina istinadən xəbər verir.
Yanğınlar Korfu adasının Agios Georgios, Halkidiki vilayətinin Simandra, Grebe vilayətinin Krania və Korinf vilayətinin Diminio bölgələrində qeydə alınıb.
Yunanıstan Yanğından Mühafizə Xidmətinin əməkdaşları ərazilərdə qurudan yanğınsöndürmə işləri aparıb. Əməliyyatlara təyyarə və helikopterlər də cəlb olunub.
Yunanıstan Mülki Müdafiə Baş Katibliyi ölkənin bir sıra bölgələrində sabah da hava şəraiti ilə əlaqədar yanğın riskinin yüksək olacağını açıqlayıb.
Bildirilib ki, Krit adası və Egey dənizinin cənub-şərqində yerləşən ərazilərdə yanğın təhlükəsi ikinci ən yüksək səviyyə olan “narıncı xəbərdarlıq” dərəcəsində olacaq. Vətəndaşlara yanğına səbəb ola biləcək hər cür fəaliyyətdən çəkinmək çağırışı edilib.
Bundan əvvəl yayılan açıqlamada paytaxt Afina da daxil olmaqla Attika, Mərkəzi Yunanıstan, Şimali Egey və Cənubi Egey bölgələri, eləcə də Peloponnes yarımadasında yanğın riskinin “narıncı xəbərdarlıq” səviyyəsində olacağı bildirilmişdi.
Krit adası və Cənubi Egey adalarında isə yanğın təhlükəsinin ən yüksək səviyyə olan “qırmızı xəbərdarlıq” dərəcəsinə çatacağı qeyd edilmişdi.
11:29 31.08.2026
Oxunuş sayı: 50
