Faciədən xal qazanmaq istəyənlər: Xalq onların cavabını verdi - AÇIQLAMA
Azərbaycan dövləti və xalqı dekabr ayında baş vermiş təyyarə qəzasına reaksiyada bir daha milli birlik və həmrəylik nümayiş etdirdi. Prezident İlham Əliyevin rəhbərliyi ilə hadisədən dərhal sonra bütün zəruri tədbirlər görüldü. Azərbaycan Respublikasının Fövqəladə Hallar Nazirliyi (FHN) yaralıları xüsusi nəzarət altında Qazaxıstandan ölkəyə gətirdi. Tibbi və psixoloji yardımlar təşkil edildi, qəza zamanı həyatını itirən pilot və ekipaj üzvlərinin cənazələri isə Azərbaycana gətirilərək 2-ci Fəxri Xiyabanda dəfn edildi. Xalq öz qəhrəmanlarına ehtiramını göstərdi.
Bununla belə, bəzi xarici təsir altında fəaliyyət göstərən qruplar hadisədən təxribat törətmək məqsədilə istifadə etməyə cəhd göstərdilər. Təyyarə qəzasına dair görüntülər montaj edildi, dezinformasiya yayıldı. Məqsəd milli-etnik qarşıdurma yaratmaq idi. Azərbaycan ictimaiyyəti bu cür təxribatlara sərt reaksiya verdi və xalqın milli birliyinə qarşı yönəlmiş bu cəhdlər qətiyyətlə rədd edildi.
Mövzu ilə bağlı Crossmedia.az-a açıqlama verən Milli Məclisin deputatı Hikmət Babaoğlu bildirib: "Baş vermiş təyyarə qəzasından sonra Azərbaycan xalqı bir daha birlik və həmrəylik nümayiş etdirdi. Xalqımız Prezident İlham Əliyevin ətrafında sıx birləşərək, bu hadisəni manipulyasiya etmək istəyənlərə və onu cinayət kimi qələmə verməyə çalışanlara layiqli cavab verdi. Milli birliyimiz bu hadisəyə münasibətdə hər kəs tərəfindən qəbul edilən möhkəm dayanışma göstərdi.”
Deputat həmçinin qeyd edib ki, bəzi qüvvələr bu milli həmrəyliyi xoş qarşılamır və hadisəni təhrif edərək cəmiyyətə təqdim etməyə çalışırlar.
"Ancaq Azərbaycan xalqı nə texniki, nə də dini zəmində əsassız ittihamlara uymaz. 1990-cı illərin əvvəllərində də bu cür təzyiqlərə boyun əyməyən xalqımız alnıaçıq və qürurla böyük tarixi zəfərlər qazandı. Heç kim Azərbaycanı yenidən 30-35 il əvvəl olduğu vəziyyətə qaytara bilməz. Xalqımız bunu bilir və hər hansı təxribat cəhdinə qəti şəkildə 'yox' deyir".
Azərbaycan xalqı bu hadisədən də milli həmrəylik və dövlət-xalq birliyi sayəsində möhkəmlənmiş şəkildə çıxmağı bacardı. Bu birlik, hər zaman olduğu kimi, milli maraqların qorunması və təxribatların qarşısının alınmasında əsas rol oynayacaq.
Maral Şahverdili
11:15 29.12.2024
Oxunuş sayı: 18213
