Prezident İlham Əliyevin Sərəncamı ilə təltif olunmuş aqrar sahədə çalışan şəxslərə orden və medallar təqdim edilib
Azərbaycan Respublikasının Prezidenti İlham Əliyevin 2024-cü il 31 oktyabr tarixli “Azərbaycan Respublikasında kənd təsərrüfatının inkişafında xidmətləri olan bir qrup şəxsin təltif edilməsi haqqında” Sərəncamına əsasən təltif olunmuş nazirlik əməkdaşları və fermerlərə orden və medallar təqdim olunub. Bu barədə Kənd Təsərrüfatı Nazirliyindən bildirilib.
Orden və medalların təqdim olunmasına həsr olunmuş tədbirdə çıxış edən kənd təsərrüfatı naziri Məcnun Məmmədov qeyd edib ki, aqrar sahənin daha da inkişafı məqsədlə dövlət tərəfindən çox böyük dəstək tədbirləri həyata keçirilir. Nazir bu gün aqrar sahədə əldə edilən uğurların və nəticələrin Prezident İlham Əliyev tərəfindən çox yüksək qiymətləndirildiyini bildirib. Qeyd olunub ki, aqrar sahədə çalışan şəxslərə ölkə başçısı tərəfindən daim böyük qayğı göstərilir. Dövlət başçısının Sərəncamı ilə kənd təsərrüfatının inkişafında xidmətləri olan bir qrup şəxsin təltif edilməsi onların əməyinə verilən yüksək dəyərdir.
Dövlət başçısının kənd təsərrüfatı sektorunda çalışan 37 nəfəri orden və medallarla təltif etdiyini xatırladan nazir Məcnun Məmmədov göstərdiyi yüksək diqqət və qayğıya görə aqrar sektorda çalışan insanlar adından Prezident İlham Əliyevə minnətdarlığını bildirib.
Prezidentin imzaladığı Sərəncamla təltif olunan nazirlik əməkdaşları və fermerlər verdiyi dəyərə görə dövlət başçısına təşəkkür ediblər.
Sonra təltif olunmuş nazirlik əməkdaşları və fermerlərə medal və vəsiqələr təqdim edilib.
08:05 29.12.2024
Oxunuş sayı: 21485
