Ərdoğan: Aİ-yə üzvlük artıq Türkiyənin prioriteti deyil
Türkiyə Prezidenti Rəcəb Tayyib Ərdoğan ölkəsinin Avropa İttifaqına üzvlüyünün artıq xarici siyasətdə prioritet olmadığını bildirib.
Crossmedia.az xəbər verir ki, bu barədə “Al Jazeera” məlumat yayıb.
Ərdoğan bildirib ki, Ankara Aİ-yə üzvlük məsələsində qapını tam bağlamayıb, lakin hazırkı mərhələdə bu istiqamət əsas prioritet hesab edilmir. Onun sözlərinə görə, Türkiyənin Aİ-yə qəbul edilməməsi nəticədə Avropanın özü üçün itkiyə çevrilə bilər.
Türkiyə liderinin bu açıqlaması Ankara ilə Brüssel arasındakı münasibətlərdə prioritetlərin dəyişdiyini göstərir. Türkiyənin Aİ-yə üzvlük danışıqları 2005-ci ildə başlayıb, lakin proses uzun müddətdir faktiki olaraq dayanıb.
Ərdoğan və onun rəhbərlik etdiyi Ədalət və İnkişaf Partiyasının son illərdə xarici siyasətdə “Türkiyə əsri”, türk dünyası və ölkənin tarixi-milli irsi kimi istiqamətlərə daha çox diqqət yetirdiyi bildirilir.
12:15 22.08.2026
Oxunuş sayı: 61
