Təbii görünüşə yeni toxunuş: Bu manikür trendə çevrilir
Təbii görünüşlü, parlaq və minimal manikürlərə yeni trend əlavə olunub.
Crossmedia.az xəbər verir ki, ELLE bu barədə məlumat yayıb.
“Coconut water” (“kokos suyu”) manikürü şəffaf və krem tonlarını birləşdirərək dırnaqlara təbii, parlaq görünüş qazandırır.
Trendə məşhur aktrisa Anne Hathaway də maraq göstərib. Onun manikürü məşhur dırnaq ustası Tom Bachik tərəfindən Kaliforniyada keçirilən “The End of Oak Street” filminin premyerası üçün hazırlanıb.
Hathaway qısa və dairəvi formalı dırnaqlarda şəffaf, krem çalarlı baza istifadə edib. Aktrisa avqustun 16-da Disney Entertainment Showcase tədbirində “Disney Legends” mükafatını qəbul edərkən də oxşar manikürlə görüntülənib. Bu dəfə dırnaqlarda parıltılı üst qat istifadə olunaraq “şəkər şüşəsi” effekti yaradılıb.
Mütəxəssislərin fikrincə, bu manikürdə dırnağın təbii görünüşünü qorumaq əsas məqsəddir. Bunun üçün əvvəlcə kutikullar səliqəyə salınmalı və dırnaq səthi hamarlanmalıdır.
Daha sonra baza qatının üzərinə bir və ya iki nazik qat şəffaf-krem rəngli gel çəkilir. Son mərhələdə yüksək parlaqlıq verən üst qat tətbiq edilir. Bu, dırnaqlara işığı əks etdirən, su kimi parlaq görünüş qazandırır.
Trend üçün parlaq ağ rənglər əvəzinə yumşaq fil sümüyü, krem-bej, vanil, açıq badam və solğun çəhrayı tonlara üstünlük verilir.
Mütəxəssislər həmçinin təbii görünüşlü manikürdə dırnaq və kutikula qulluğunun vacib olduğunu bildirirlər. Xüsusilə yay aylarında günəş və hovuz suyunun yaratdığı quruluğun qarşısını almaq üçün kutikula yağından müntəzəm istifadə tövsiyə olunur.
17:56 18.08.2026
Oxunuş sayı: 46
