Prezidentlər danışdı - Əsas məsələ komissiyanın obyektiv şəkildə çalışmasıdır
Dekabrın 27-də Azərbaycan Prezidenti İlham Əliyev Qazaxıstan Prezidenti Kasım-Jomart Tokayevə zəng edərək, Qazaxıstanda Azərbaycan və Qazaxıstan vətəndaşlarının olduğu təyyarə qəzası nəticəsində həlak olanlara başsağlığı verib, yaralananlara isə şəfa arzulayıb. Dövlət başçısı Qazaxıstanın xilasedicilərinə və tibbi personalına göstərdikləri operativlik və peşəkarlığa görə təşəkkür edib. Eyni zamanda, Qazaxıstan xalqının həmrəylik nümayiş etdirməsi Azərbaycan ictimaiyyəti tərəfindən böyük təqdirlə qarşılanıb.
Prezident Kasım-Jomart Tokayev qəzanın araşdırılması üçün xüsusi komissiya yaradıldığını və istintaqın şəffaf şəkildə aparılacağına dair zəmanət verdiyini bildirib.
Mövzu ilə bağlı Crossmedia.az-a açıqlama verən Milli Məclisin deputatı Hikmət Babaoğlu Qazaxıstanın göstərdiyi diqqət və qardaşlıq münasibətini yüksək qiymətləndirib:
“Faciənin baş verməsindən dərhal sonra Qazaxıstan rəsmilərinin və xalqının göstərdiyi diqqət və qardaşlıq münasibəti yüksək qiymətləndirilməlidir. Düşünürəm ki, Qazaxıstanın bütün dövlət qurumları qarşıya qoyulan vəzifələri layiqincə yerinə yetirdilər. Qardaş ölkənin prezidentinin Azərbaycan prezidentinə zəng edərək başsağlığı verməsi, Qazaxıstan-Azərbaycan münasibətlərinin və qardaşlıq əlaqələrinin nə qədər dərin olduğunu bir daha sübut edir.”
Deputat Qazax xalqının Azərbaycana göstərdiyi həmrəylik jestlərini də vurğulayıb:
“Bundan əlavə, Azərbaycanın Qazaxıstandakı səfirliyinə Qazax xalqının başsağlığı müraciətləri, xatirə dəftərinə yazılan fikirlər və hətta təşkil edilən anım aksiyaları bu münasibətlərin nə qədər səmimi və strateji xarakter daşıdığını göstərir.”
Hikmət Babaoğlu qəzanın obyektiv şəkildə araşdırılmasının vacibliyini xüsusi qeyd edib:
“Ən əsas məsələ qəzanın səbəblərini araşdırmaq üçün yaradılan komissiyanın obyektiv şəkildə fəaliyyət göstərməsidir. Azərbaycan və Qazaxıstan ictimaiyyəti bu məsələnin diqqətli izləyicisidir. Əminik ki, yaradılmış komissiya obyektiv və düzgün araşdırma apararaq qəzanın başvermə səbəblərini dəqiq şəkildə açıqlayacaq. Azərbaycanın buna olan inamı tamdır.”
Maral Şahverdili
11:21 28.12.2024
Oxunuş sayı: 4223
