Şimpanzelərin "təbii apteki" alimləri heyrətləndirdi
Uqandada aparılan araşdırma vəhşi şimpanzelərin ağrıkəsici və antibakterial xüsusiyyətlərə malik bitkilərlə özlərini müalicə etdiyini ortaya çıxarıb.
Crossmedia.az xarici mediaya istinadən xəbər verir ki, alimlər bu davranışın gələcəkdə yeni dərman preparatlarının hazırlanmasına töhfə verə biləcəyini bildirirlər.
Araşdırmaya rəhbərlik edən Oksford Universitetinin tədqiqatçısı Elodi Freymanın sözlərinə görə, məqsəd şimpanzelərin təbii "müalicə üsulları" barədə bilikləri genişləndirmək olub. Tədqiqat çərçivəsində alimlər heyvanların sağlamlıq vəziyyətini və qidalanmasını izləyərək xəstə və ya yaralı olduqları zaman hansı bitkiləri seçdiklərini araşdırıblar.
Toplanan bitki nümunələrinin laborator analizləri göstərib ki, şimpanzelərin istifadə etdiyi bitkilərin 88 faizi güclü antibakterial, 33 faizi isə iltihabəleyhinə xüsusiyyətlərə malikdir. Bu isə onların bakterial infeksiyalar, parazitlər və müxtəlif zədələr zamanı məqsədli şəkildə müəyyən bitkiləri seçdiyini göstərir.
Alimlər bildirirlər ki, bu nəticələr təəccüblü görünsə də, şimpanzelərin yüksək intellektə malik olması və yaşadıqları mühitdə faydalı bitkiləri müəyyən edə bilməsi barədə əvvəlki elmi qənaətlərlə üst-üstə düşür. Araşdırmanın nəticələrinin gələcəkdə yeni dərmanların hazırlanması istiqamətində mühüm elmi baza yarada biləcəyi vurğulanır.
07:43 24.07.2026
Oxunuş sayı: 47
