Tim Kuk “Apple” şirkətinin baş direktoru vəzifəsində 15 ildən sonra səlahiyyətlərini Con Ternusa təhvil verib.
Crossmedia.az xəbər verir ki, “Daily Mail” bu barədə məlumat yayıb.
Kukun rəhbərliyi dövründə “Apple” dünyanın ən böyük və ən gəlirli şirkətlərindən biri kimi mövqeyini möhkəmləndirib. Onun uğurunun səbəblərindən biri kimi isə illərdir dəyişməyən səhər rejimi göstərilir.
“Apple” tərəfindən yayımlanan “İcmaya məktub”da Kuk rəhbərlik etdiyi müddətdə səhərlərini necə keçirdiyini açıqlayıb. O bildirib ki, son 15 il ərzində demək olar ki, hər səhərə eyni şəkildə başlayıb: əvvəlki gün dünyanın müxtəlif yerlərindəki “Apple” istifadəçilərindən gələn elektron məktubları oxuyub.
Kuk daha əvvəl “Table Manners with Jessie and Lennie Ware” podkastında günə səhər saat 5-də başladığını demişdi. O, səhər saatlarını gün ərzində ən çox nəzarət edə bildiyi vaxt kimi qiymətləndirib.
Onun sözlərinə görə, gün irəlilədikcə hadisələr daha az proqnozlaşdırılan olur və müxtəlif məsələlər insanın vaxtını, diqqətini və enerjisini ələ keçirə bilir. Buna görə Kuk günün əvvəlində dünyadan bir qədər uzaqlaşıb sakitlik içində vacib məsələlərə fokuslanmağa üstünlük verib.
Kukun sözlərinə görə, “Apple” istifadəçiləri məktublarında şəxsi həyatlarından müxtəlif hekayələr və şirkətin məhsullarının onlara necə təsir etdiyinə dair nümunələr bölüşürdülər.
Bəzi istifadəçilər “Apple Watch” sayəsində yaxınlarının həyatının xilas olduğunu yazır, digərləri isə dağ zirvəsində çəkdikləri uğurlu fotolardan danışırdılar.
İstifadəçilər həmçinin “Mac” kompüterlərinin işlərinə necə təsir etdiyini bölüşür, bəzən isə onlar üçün vacib olan hansısa funksiyanın düzgün işləməməsi ilə bağlı tənqidlərini bildirirdilər.
