Qətər İrana və ABŞ-yə dialoqu davam etdirməyə çağırıb
Qətərin Baş naziri və xarici işlər naziri Şeyx Məhəmməd bin Əbdülrəhman Al Tani İranın xarici işlər naziri Abbas Əraqçi ilə telefon danışığında Tehran və Vaşinqtonu dialoqu davam etdirməyə və qarşılıqlı anlaşma memorandumunun şərtlərinə əməl etməyə çağırıb.
Crossmedia.az xəbər verir ki, bu barədə Qətər Xarici İşlər Nazirliyi məlumat yayıb.
Al Tani bütün tərəflərin dialoq və diplomatiyaya sadiq qalmasının, həmçinin qarşılıqlı anlaşma memorandumu çərçivəsində razılaşdırılmış öhdəliklərin yerinə yetirilməsinin vacibliyini vurğulayıb.
Telefon danışığı zamanı tərəflər İranla ABŞ arasında gərginliyin artmasını və Hörmüz boğazında ticarət gəmilərinə son hücumları da müzakirə ediblər.
Qətərin baş naziri bildirib ki, bu cür hücumlar qarşılıqlı etimadı sarsıdır, beynəlxalq gəmiçiliyin təhlükəsizliyinə təhdid yaradır və regional sabitliyə mənfi təsir göstərir.
Xatırladaq ki, iyulun 7-də Səudiyyə Ərəbistanı Xarici İşlər Nazirliyi İranın Hörmüz boğazında krallığa məxsus "Vijian" tankerinə və Qətərə məxsus "Al-Rekkayat" tankerinə hücum etdiyini açıqlamış və bu addımı pisləmişdi.
12:13 09.07.2026
Oxunuş sayı: 61
