ABŞ Suriyanı terroru dəstəkləyən ölkələr siyahısından çıxarır
ABŞ Suriyanın terrorizmi dəstəkləyən dövlət statusunu ləğv etmək qərarına gəlib.
Crossmedia.az xəbər verir ki, "CNN" bu barədə ABŞ dövlət katibi Marko Rubionun açıqlamasına istinadən məlumat yayıb.
Rubio bildirib ki, bu qərar Suriyanın beynəlxalq ticarət və investisiyalara çıxışını asanlaşdıracaq, ölkənin bərpasına imkan yaradacaq və Suriya xalqı üçün yeni mərhələnin əsasını qoyacaq.
Onun sözlərinə görə, özü və qonşuları ilə sülh şəraitində yaşayan sabit Suriya təkcə Yaxın Şərqə deyil, bütün dünyaya fayda verəcək.
ABŞ dövlət katibi qeyd edib ki, iyulun 8-də Prezident Donald Tramp administrasiyası Suriyanın bu statusdan çıxarılması niyyəti barədə Konqresi məlumatlandırıb. Qərar qanunvericiliyə uyğun olaraq 45 günlük bildiriş müddətindən sonra qüvvəyə minəcək.
Xatırladaq ki, 2024-cü il dekabrın 8-də ABŞ və Türkiyənin dəstəklədiyi "Azad Suriya Ordusu"nun komandanlığı Bəşər Əsəd hakimiyyətinin başa çatdığını elan etmişdi. Əsəd ölkəni tərk etmiş, 2025-ci il yanvarın 29-da isə Əhməd əş-Şaraa Suriyanın keçid dövrü üzrə prezidenti təyin olunmuşdu.
10:32 09.07.2026
Oxunuş sayı: 47
