Çin Yaxın Şərqdən ucuz neft alışını artırıb
Çində fəaliyyət göstərən özəl neft emalı zavodları Hörmüz boğazında gəmiçiliyin bərpası və dünya bazarında xammal qiymətlərinin ucuzlaşması fonunda Yaxın Şərqdən endirimli qiymətlərlə neft alışını artırıblar.
Crossmedia.az xəbər verir ki, ˝Reuters˝ bu barədə ticarət mənbələrinə istinadən məlumat yayıb.
Məlumata görə, son alışların əsas iştirakçıları Çinin şərqində yerləşən Şandun əyalətindəki neft emalı zavodları olub. Dünyanın ən böyük neft idxalçısı olan Çində tələbatın artması Rusiya və İranın ixrac axınlarına da təsir göstərərək bu ölkələri xam neftin qiymətini aşağı salmağa məcbur edir.
Mənbələrin bildirdiyinə görə, son sövdələşmələrdən birində Abu Dabi Milli Neft Şirkəti (ADNOC) ilə Çinin Dongming Petrochemical və Shenghong Petrochemical şirkətləri iştirak edib. Hər iki şirkət Upper Zakum markalı iki milyon barel nefti bir barelə görə 7–9 ABŞ dolları endirimlə alıb.
Reuters yazır ki, ADNOC iyun ayında Fars körfəzində hasil olunan neftin satışını əhəmiyyətli dərəcədə artırıb. Ekspertlərin fikrincə, Hörmüz boğazında gəmiçiliyin bərpası yaxın dövrdə Birləşmiş Ərəb Əmirliklərindən neft tədarükünün daha da artmasına şərait yarada bilər.
18:06 03.07.2026
Oxunuş sayı: 60
