Almaniya Ukraynaya hərbi yardım üçün 11,5 milyard avro ayıracaq
Almaniyanın 2026-cı il dövlət büdcəsində və 2027-ci il büdcə layihəsində Ukraynaya hərbi yardım üçün ümumilikdə 11,5 milyard avro vəsait nəzərdə tutulub.
Crossmedia.az xəbər verir ki, bu barədə Ukraynanın Almaniyadakı səfiri Aleksey Makeyev "Ukrinform" agentliyinə müsahibəsində bildirib.
Makeyevin sözlərinə görə, ayrılan məbləğ Almaniyanın ümumi daxili məhsulunun təxminən 0,25 faizini təşkil edir.
"2022-ci ildə söhbət yüz milyonlarla avrodan gedirdisə, indi 2026-cı ilin büdcəsində və 2027-ci ilin büdcə layihəsində Ukraynaya hərbi yardım üçün 11,5 milyard avro nəzərdə tutulub. Bu, Almaniya ÜDM-nin təxminən 0,25 faizidir", – deyə diplomat bildirib.
Səfir qeyd edib ki, Almaniya Ukraynaya hava hücumundan müdafiə sistemləri üçün raketlər, uzaqmənzilli silahlar, ayrı-ayrı hərbi bölmələrin maliyyələşdirilməsi və birgə silah istehsalı da daxil olmaqla müxtəlif istiqamətlərdə dəstək göstərir.
Onun sözlərinə görə, hazırda Almaniya və Ukrayna arasında uzaqmənzilli silahlar və hava hücumundan müdafiə sistemləri üçün tutucu raketlərin istehsalı ilə məşğul olan ondan çox birgə müdafiə müəssisəsi fəaliyyət göstərir.
Makeyev müsahibəsində həmçinin bildirib ki, Almaniya Ukraynaya hərbi dəstək məsələsində əvvəlki "qırmızı xətlər" siyasətindən faktiki olaraq imtina edib.
13:54 03.07.2026
Oxunuş sayı: 52
