Ermənistanda seçkilərlə bağlı uyğunsuzluq aşkarlanıb
Ermənistanda müxalifətdə olan "Ermənistan" blokunun nümayəndəsi Hovhannes Xudoyan parlament seçkiləri ilə bağlı Mərkəzi Seçki Komissiyasının (MSK) məlumatlarında uyğunsuzluqlar aşkar etdiklərini iddia edib.
Bu barədə Crossmedia.az RİA Novosti agentliyinə istinadən xəbər verir.
Nümayəndənin sözlərinə görə, məntəqə seçki komissiyalarının qeydiyyat jurnallarındakı imzaların sayı ilə MSK-nın seçkilərdə iştirak edən seçicilərin sayı barədə açıqladığı rəqəmlər arasında fərq var.
“27,8 min imzanın çatışmadığını müəyyən etmişik. Hesab edirik ki, səsvermədə iştirak edən seçicilərin sayı ilə imzaların sayı eyni olmalıdır”, – deyə Xudoyan bildirib.
O əlavə edib ki, Ermənistan MSK-sı bu fərqi əvvəlcə qapalı siyahılar üzrə səs verən seçicilərlə izah edib.
Xatırladaq ki, Ermənistanda parlament seçkiləri iyunun 7-də keçirilib. Seçkilərdə iki siyasi blok və 16 partiya mübarizə aparıb. Yekun nəticələrə əsasən, Baş nazir Nikol Paşinyanın rəhbərlik etdiyi "Vətəndaş Müqaviləsi" Partiyası səslərin 49,7 faizini toplayaraq parlamentdə çoxluğu əldə edib və hökuməti təkbaşına formalaşdırmaq imkanı qazanıb.
Parlamentdə həmçinin "Güclü Ermənistan" bloku (23,2 faiz) və "Ermənistan" bloku (9,9 faiz) təmsil olunacaq. "Çiçəklənən Ermənistan" Partiyası isə 3,9 faiz səs topladığı üçün parlamentə keçmək üçün tələb olunan 4 faizlik baryeri aşa bilməyib.
19:05 30.06.2026
Oxunuş sayı: 55
