Vüqar Qurbanov: "Müasir texnologiyalarla səhiyyə xidmətləri daha keyfiyyətli olacaq"
Bu gün Bakıda Səhiyyə İdarəçiləri Zirvəsi keçirilib. Tədbirdə TƏBİB-in İcraçı direktoru Vüqar Qurbanov çıxış edib. O, səhiyyə idarəçiliyinin inkişafı və bu sahədə tətbiq olunan yeniliklər haqqında geniş məlumat verib.
Vüqar Qurbanov bildirib ki, müasir dövrdə səhiyyə idarəçiliyi ənənəvi üsullarla yanaşı, müasir standartlara uyğun innovativ metodlarla təkmilləşdirilməlidir. Onun sözlərinə görə, tibb personalının bilik və bacarıqlarının artırılması, maddi-texniki bazanın gücləndirilməsi və xidmət keyfiyyətinin artırılması üçün kompleks yanaşmalar tətbiq edilməlidir.
Çıxışda qeyd edilib ki, TƏBİB Azərbaycanın səhiyyə sistemində müasir idarəetmə standartlarının tətbiqi, resursların effektiv idarə edilməsi və rəqəmsallaşdırılma sahəsində ciddi addımlar atır. O, Ankara Universiteti ilə əməkdaşlıq çərçivəsində keçirilən təlimlərin və imzalanmış Anlaşma Memorandumunun bu istiqamətdə əhəmiyyətli olduğunu vurğulayıb.
Vüqar Qurbanov, həmçinin Yeni Klinikada tətbiq olunan onlayn növbə sistemi, HIMSS EMRAM 6 akkreditasiyası və Xəstəxana İdarəetmə Sisteminin təkmilləşdirilməsi ilə bağlı görülən işlərdən danışıb. Onun sözlərinə görə, təcili tibbi yardım sisteminin rəqəmsallaşdırılması 2025-ci ilə qədər tamamlanacaq.
Statistik məlumatları da təqdim edən Vüqar Qurbanov, 2024-cü ildə TƏBİB-in tabeliyindəki tibb müəssisələrində 24.2 milyon müraciətin qeydə alındığını, 83.2 milyon xidmət göstərildiyini qeyd edib. O, idarəetmə və innovasiya potensialının artırılması məqsədilə rəhbər heyətin seçimi və struktur dəyişikliklərinin önəmini də vurğulayıb.
Sonda Vüqar Qurbanov, dövlət və özəl səhiyyə qurumlarının nümayəndələrinin iştirakı ilə keçirilən müzakirələrin Azərbaycan səhiyyəsinin inkişafına böyük töhfə verəcəyinə inandığını bildirib.
Maral Şahverdili
09:02 18.12.2024
Oxunuş sayı: 9459
