"Ingla İnternational" ETC Özbəkistan universitetləri ilə müqavilə imzalayıb
23 mayda Bakıda keçirilən Özbəkistan Ali Təhsil Müəssisələrinin III Təhsil Sərgisində iştirak edən qardaş ölkənin universitetləri əməkdaşlıq müqavilələri imzalayıblar.
Qeyd edək ki, müqavilələr sərginin təşkilatçısı "Ingla İnternational Education and Traning Centre"-lə imzalanıb.
Crossmedia.az xəbər verir ki, müqaviləni Özbəkistan tərəfdən Əndican Dövlət Texniki İnstitutunun Beynəlxalq əməkdaşlıq şöbəsinin müdiri Fatima Karimova, Qarşı Dövlət Universitetinin əməkdaşı Dilsuz Musayeva, Əbu Reyhan Biruni Universitetinin Beynəlxalq Proqramlar üzrə mütəxəssisi İslam Kahdirov, Termez Dövlət Pedaqoji İnstitutunun Pedaqogika və İbtidai Təhsil Metodikası kafedrasının müəllimi Lobar Mardanova, Özbəkistan Dünya Dillər Universitetinin Beynəlxalq əməkdaşlıq şöbəsinin mütəxəssisi Durdono Khodjebekova və Daşkənd Dövlət Aqrar Universitetinin Birgə Təhsil proqramları fakültəsinin dekanı Farrux Yakubov imzalayıblar.
Əməkdaşlıq çərçivəsində proqramlarının həyata keçirilməsi, birgə elmi və akademik layihələrin keçirilməsi, beynəlxalq təhsil imkanlarının genişləndirilməsi, həmçinin azərbaycanlı gənclərin Özbəkistan universitetlərində bakalavr, magistratura və doktorantura pillələri üzrə təhsil almaları üçün imkanların yaradılması nəzərdə tutulur. Bununla yanaşı, tərəflər arasında akademik əlaqələrin gücləndirilməsi, tələbələrin müxtəlif beynəlxalq təcrübə proqramlarına cəlb olunması istiqamətində də əməkdaşlıq ediləcək.
Turqut Ansari
23:02 25.05.2026
Oxunuş sayı: 85
