Turin Politexnik Universitetinin nümayəndəsi: Daha çox azərbaycanlı tələbəni universitetimizdə görməkdən məmnun olarıq
Mayın 23-ü Bakıda Özbəkistan universitetlərinin III Təhsil Sərgisi keçirilib. Tədbir “Ingla International ETC”, Özbəkistan Ali Təhsil Nazirliyi, Özbəkistanın Azərbaycandakı səfirliyi və AMEA-nın Mərkəzi Elmi Kitabxanasının dəstəyi ilə təşkil olunub. Sərgidə Özbəkistanın müxtəlif ali təhsil müəssisələri iştirak edib, tələbələrə təhsil imkanları, ixtisas seçimləri və qəbul şərtləri barədə ətraflı məlumat verilib. Qeyd etmək lazımdır ki, tədbirin əsas məqsədi Azərbaycan və Özbəkistan arasında təhsil sahəsində əməkdaşlığın genişləndirilməsi və gənclərin beynəlxalq təhsil imkanları ilə tanış edilməsidir.
Crossmedia.az-a bu barədə danışan Turin Politexnik Universitetinin nümayəndəsi Dilnoza Djurayevanın sözlərinə görə, Bakıda keçirilən təhsil sərgisində iştirak etmək onlar üçün həm maraqlı, həm də uğurlu təcrübə olub: " Sərgidə iştirak etmək mənim üçün çox xoş oldu. Biz burada ikinci dəfədir iştirak edirik. İlk dəfə ötən il qatılmışdıq. Hazırda bu sərgi nəticəsində Azərbaycandan iki tələbəmiz təhsil alır. Onlardan biri birinci kursda oxuyan oğlandır, digəri isə ikinci kursda oxuyan qızdır. Gələcəkdə isə Azərbaycandan daha çox abituriyentin bizə gələcəyinə ümid edirik. Biz onları məmnuniyyətlə qəbul edəcəyik".
Müsahibimiz sərgi ilə bağlı təəssüratlarını bölüşüb: "Sərgi ümumilikdə çox yüksək səviyyədə təşkil olunmuşdu və çoxlu abituriyentlər bizə yaxınlaşıb maraq göstərirdilər. Məni xüsusilə sevindirən məqam odur ki, onlar yalnız bakalavr deyil, həm də magistratura və doktorantura təhsili ilə maraqlanırdılar. Bu, bizim üçün çox müsbət haldır. Azərbaycanlı və xarici tələbələr üçün imtahansız və testsiz qəbul imkanı mövcuddur ki, bu da onlara əlavə üstünlük yaradır. Bundan əlavə, bizim "2+2" proqramımız var. Tələbələr 2 il Təşkənddə, 2 il isə İtaliyada təhsil alır və sonda iki diplom əldə edirlər - biri Avropa (İtaliya), digəri isə Özbəkistan diplomu. Bunun üçün IELTS və SAT sertifikatı tələb olunur. Həmçinin tələbələr birbaşa ikinci kursdan təhsilə başlaya bilirlər. Bu halda bakalavr təhsili 3 ilə tamamlanır. Bunun üçün Təşkəndə gələrək imtahan vermək və minimum 50 bal toplamaq kifayətdir. Biz daha çox azərbaycanlı tələbəni universitetimizdə görməkdən məmnun olarıq və əməkdaşlığı davam etdirmək istəyirik”.
Fatimə Məmmədli
18:56 25.05.2026
Oxunuş sayı: 50
