Bakıda tədbir günləri yollar niyə kilidlənir? – ekspert açıqladı
Bakıda nəqliyyat sıxlığının artdığı saatlarda müşahidə olunan əsas problemlərdən biri də sürücülərin qaydaları pozaraq əks istiqamətə çıxmasıdır.
Xüsusilə, dar ara küçələrdə və alternativ çıxış yollarında yaranan tıxac zamanı bəzi sürücülər vaxt qazanmaq məqsədilə qarşı hərəkət zolağına daxil olur ki, bu da vəziyyəti daha da gərginləşdirir.
Nəticədə həm hərəkət iflic olur, həm də digər sürücülər üçün təhlükəli vəziyyət yaranır. Bu cür qayda pozuntuları təkcə tıxacın uzanmasına deyil, eyni zamanda qəza riskinin artmasına da səbəb olur.
Mütəxəssislərin fikrincə, problemin həlli üçün nəzarət mexanizmlərinin gücləndirilməsi, bəzi küçələrdə ağıllı kameraların və avtomatik cərimə sistemlərinin tətbiqi vacibdir.
Bununla yanaşı, hərəkətin düzgün təşkili, birtərəfli küçələrin sayının artırılması və sıxlıq olan ərazilərdə operativ idarəetmə sistemlərinin qurulması da vəziyyətin tənzimlənməsinə kömək edə bilər.
Eyni zamanda, sürücülər arasında yol hərəkəti mədəniyyətinin formalaşdırılması və qaydalara əməl olunmasının vacibliyi ilə bağlı maarifləndirmə işlərinin genişləndirilməsi də əsas həll yollarından biri hesab olunur.
Məsələ ilə bağlı nəqilliyyat üzrə ekspert Adil Nəbiyev Crossmedia.az-a öz fikirlərini bölüşüb:
"Xüsusilə konsert, futbol oyunu, toy məkanları və digər kütləvi tədbirlər zamanı yaranan sıxlıqda ən böyük problemlərdən biri sürücülərin səbirsizlik edib əks yola çıxmasıdır. İlk baxışda bəzi sürücülərə elə gəlir ki, bu yolla bir neçə dəqiqə vaxt qazanırlar, amma əslində nəticədə yol tam bloklanır və tıxac daha da ağır vəziyyətə düşür.
Çünki qarşı istiqamətdən gələn avtomobillərlə hərəkət bir nöqtədə kilidlənir və “şahmat effekti” yaranır. Bu artıq təkcə qayda pozuntusu deyil, ümumi nəqliyyat sisteminin iflic olması deməkdir.
Bu problemin qarşısını almaq üçün ilk növbədə nəzarət mexanizmi gücləndirilməlidir. Xüsusilə, tədbir keçirilən ərazilərdə mobil kameralar, əlavə patrul ekipajları və operativ monitorinq sistemi qurulmalıdır.
Çünki sürücü bilməlidir ki, əks yola çıxma anında qeydə alınacaq və cəzasız qalmayacaq. Dünyanın bir çox ölkəsində belə hallarda avtomatik kamera sistemi birbaşa xətt üzrə hərəkəti analiz edir və əks istiqamətə daxil olan avtomobili dərhal qeydiyyata alır.
Cərimələrin sərtləşdirilməsi də vacib addımlardan biri ola bilər. Çünki bəzi sürücülər mövcud cəriməni risk kimi deyil, “çıxış yolu” kimi qəbul edir. Halbuki, tədbir vaxtı bilərəkdən əks yola çıxaraq ümumi hərəkəti iflic edən sürücülərə daha ağır maliyyə cəriməsi, cərimə balı və hətta müəyyən müddət sürücülük hüququnun məhdudlaşdırılması tətbiq oluna bilər.
Təkrar hallarda daha sərt yanaşma effekt verə bilər. Digər vacib məsələ yolun fiziki olaraq qorunmasıdır. Bir çox ölkədə tədbir və pik saat zamanı ara yollarda müvəqqəti plastik ayırıcılar, rezin maneələr və portativ baryerlər quraşdırılır ki, sürücü texniki olaraq əks yola çıxa bilməsin.
Bəzən sadəcə bir neçə metr baryer belə onlarla avtomobilin qayda pozmasının qarşısını alır. Bununla yanaşı, tədbirlər zamanı əvvəlcədən xüsusi hərəkət planı hazırlanmalıdır. Yəni hansı küçənin birtərəfli olacağı, hansı istiqamətin bağlanacağı və hansı alternativ marşrutların istifadə ediləcəyi sürücülərə öncədən bildirilməlidir. Ən böyük problemlərdən biri odur ki, insanlar son anda sıxlığın içinə düşür və panik şəkildə qayda pozmağa başlayır.
Maarifləndirmə də önəmlidir. Çünki bir çox sürücü düşünür ki, “hamı edir, mən də çıxım”. Halbuki, bir avtomobilin əks yola çıxması arxasınca onlarla digər sürücünü də eyni qayda pozuntusuna sövq edir və nəticədə tam xaos yaranır.
İnsanlara izah olunmalıdır ki, əks yola çıxmaq tıxacdan çıxış deyil, tıxacın əsas səbəblərindən biridir. Ən effektiv həll isə cəza, nəzarət və düzgün yol idarəetməsinin birlikdə tətbiq edilməsidir.
Təkcə cərimə ilə problem həll olunmur, təkcə polis nəzarəti də kifayət etmir. Sistem elə qurulmalıdır ki, sürücünün həm qayda pozmağa imkanı azalmalı, həm də qayda pozduğu halda qaçılmaz şəkildə məsuliyyət daşıyacağını bilməlidir".
Elmir Heydərli
09:47 25.05.2026
Oxunuş sayı: 54
