Azərbaycan və Türkiyəni müharibəyə çəkmək istəyənlərin məqsədi açıqlandı
Son günlər regionda baş verən hadisələr və Türkiyə ərazisində raket hücumları ilə bağlı yayılan məlumatlar müxtəlif suallar doğurur. İran rəsmilərinin bu hadisələrdə iştirak etmədiklərini bəyan etməsi isə prosesin arxasında başqa qüvvələrin olub-olmaması ehtimalını gündəmə gətirir. Artan gərginlik region ölkələrinin təhlükəsizliyi ilə bağlı narahatlıqları daha da artırır.
Mövcud vəziyyətlə bağlı Crossmedia.az-a “Alyans” Araşdırmalar Mərkəzinin rəhbəri Abutalıb Səmədov danışıb.Onun sözlərinə görə, Türkiyə ərazisində bir neçə dəfə raket atılması və İran rəsmilərinin bu hadisənin İran tərəfindən törədilmədiyini bəyan edilməsi üçüncü ölkənin təxribatı ehtimalını xeyli artırır:
" Bu cür qarşıdurmalar zamanı böyük dövlətləri prosesə cəlb etmək halları bundan əvvəl də olub. Yəqin ki, bundan sonra da bu cür təcrübədən istifadə olunacaq. Əslində isə İran Türkiyə ilə münasibətlərin pozulmasında qətiyyən maraqlı ola bilməz. Türkiyənin tutduğu mövqe aydındır və İranı kəskin şəkildə müdafiə edən, ABŞ və İsraili tənqid edən ölkələrin başında Türkiyə gəlir. Bu səbəbdən İranın Türkiyəyə raket atmaqda maraqlı olması mümkün görünmür və təxribat ehtimalını təbii ki, xeyli artırır. Türkiyənin və Azərbaycanın müharibəyə cəlb olunması İran üçün çox ciddi problemlər yarada bilər. Çünki ABŞ və İsrail quru əməliyyatı keçirmədən öz məqsədlərinə nail ola bilməyəcəklərini anlayırlar və bunun üçün də İranla həmsərhəd olan dövlətlərin hansısa ərazisindən istifadə olunmalıdır. Bu səbəbdən bəzi qüvvələr bu cür təxribatlar törətməkdə maraqlı ola bilərlər və bunlar nəzərə alınmalıdır".
Bundan əlavə, o, bildirib ki, regionda gərginlik artarsa, bu, Qafqazın və bu ərazidə yerləşən ölkələrin təhlükəsizliyi ilə bağlı çox ciddi problemlər yarada bilər:
" Qafqazda yerləşən dövlətlərin ərazilərinin raket atəşinə, dron hücumlarına məruz qalması, ekoloji problemlərin yaranması mümkündür. Çünki böyük müharibə həm də böyük ekoloji problemlər deməkdir. Qaçqınların qonşu dövlətlərə axın etməsi də hər zaman böyük problem olub. Dövlətlərin münaqişə zonalarında üzləşdikləri ən böyük təhlükələrdən biri də qonşu dövlətlərə qaçqın axınıdır".
Fatimə
12:30 17.03.2026
Oxunuş sayı: 62
