Ərdoğan: Bölgədə sülhdən başqa heç bir məqsədimiz yoxdur
Türkiyə Prezidenti Rəcəb Tayyib Ərdoğan bölgədə baş verən gərginliklərə münasibət bildirərək İsrailin təhrikləri ilə İrana qarşı başlayan müharibənin regionda ciddi dağıntılara səbəb olduğunu qeyd edib.
Crossmedia.az bu barədə xarici mediaya istinadən xəbər verir.
Dövlət başçısı bildirib ki, problemlərin masa arxasında həll olunması üçün imkanlar olduğu halda yanlış hesablamalar və müxtəlif təhriklər nəticəsində bölgə yenidən münaqişə və gərginliklə üz-üzə qalıb.
Ərdoğan Türkiyənin region xalqlarına münasibətdə heç vaxt məzhəb və etnik fərqlərə görə yanaşmadığını vurğulayıb:
“Biz bölgəmizin tamamına olduğu kimi, qardaş İran xalqına da ‘bu şiədir, bu sünnidir, bu türkdür, bu kürddür’ deyə heç vaxt baxmamışıq və baxmırıq. Millət olaraq bizim üçün ərəb, kürd, sünni, şiə yox, sadəcə insan var. Haqsızlığa uğrayan, çətinlik çəkən kim varsa, biz onun yanındayıq”.
Türkiyə lideri həmçinin ölkəsinin regionda bütün dövlətlərin ərazi bütövlüyünü dəstəklədiyini qeyd edib:
“Bölgədəki bütün ölkələrin ərazi bütövlüyünü müdafiə edirik. Bizim sülhdən başqa heç bir məqsədimiz yoxdur. Heç bir ölkənin suverenliyində, torpaqlarında gözümüz yoxdur. Suverenliyimizə göz dikənlərə də ‘hodri meydan’ deməkdən çəkinmərik”.
17:10 11.03.2026
Oxunuş sayı: 49
