Rusiya və Ukrayna niyə anlaşa bilmir? - Əsl səbəb açıqlandı
Artıq 5 ildir davam edən Rusiya Ukrayna müharibəsinin həlli istiqamətində bir çox dövlətlər vasitəçi qismində çıxış etdilər. Lakin müharibənin öz axarında davam etməsi bu təkliflərin, hətta ABŞ-nin vasitəçiliyinin də nəticə vermədiyini göstərdi. Tərəflər itki verməkdə davam edir, ərazi iddiaları bitmir. Müharibənin həlli üçün növbəti təklifi isə Roma Papası XIV Leo verdi. Papa qeyd edib ki, hər kəsin şahidi olduğu dramatik vəziyyət qəlbimi yenidən parçalayır. Maraqlıdır 5 ildə heç bir nəticə verməyən vasitəçilik təkliflərindən sonra Roma Papasının təklifi özünü doğrulda biləcəkmi?
Mövzu ilə bağlı politoloq Zeynal Əmrəliyev Crossmedia.az-a açıqlama verib:
"Açığı Vatikan rəhbərinin Rusiya və Ukrayna arasında vasitəçilik missiyasını effektiv şəkildə yerinə yetirə biləcək qədər siyasi gücə malik olduğunu söyləmək çətindir. Xüsusilə nəzərə almaq lazımdır ki, Roma Papası Fransisk katolik dünyasının lideridir, halbuki həm Rusiya, həm də Ukrayna əsasən pravoslav xristian ənənəsinə mənsub dövlətlərdir. Bu dini-konfessional fərq də Vatikanın münaqişədə təsir imkanlarını müəyyən qədər məhdudlaşdıran amillərdən biri kimi qiymətləndirilə bilər. Digər tərəfdən, münaqişənin son dərəcə mürəkkəb və çoxşaxəli xarakter daşıması vasitəçilik səylərini ümumilikdə çətinləşdirir. Hətta dünyanın aparıcı güclərindən biri olan Amerika Birləşmiş Ştatları belə tərəflər arasında tam vasitəçilik missiyasını həyata keçirə bilməyib. ABŞ müxtəlif diplomatik təşəbbüslərlə çıxış etsə də, bu günədək real və davamlı nəticələrin əldə olunduğunu demək çətindir. Bu mənada mövcud vəziyyət münaqişənin sülh yolu ilə həllinin olduqca çətin olduğunu göstərir”.
Politoloq əlavə edib ki, tərəflərin mövqeləri arasındakı kəskin fərqlər də konsensusun əldə olunmasını mürəkkəbləşdirir: “Rusiya tərəfi bildirir ki, Ukrayna Donbasdan geri çəkilmədiyi təqdirdə tam sülhün əldə edilməsi mümkün deyil və eyni zamanda atəşkəs ideyasına da skeptik yanaşaraq münaqişənin yalnız yekun sülh razılaşması ilə başa çata biləcəyini vurğulayır. Ukrayna isə əksinə, Rusiyanın bütün qoşunlarını öz ərazilərindən tam şəkildə çıxarmasını tələb edir və heç bir ərazi güzəştinə getməyəcəyini, suverenlik məsələsini prinsipial mövqe kimi qoruduğunu bəyan edir. Beləliklə, tərəflərin maksimalist və qarşılıqlı ziddiyyətli tələbləri ümumi razılaşmanın əldə olunmasını ciddi şəkildə çətinləşdirir. Son dövrdə ABŞ vasitəçiliyi ilə müəyyən sülh danışıqları aparılsa və zaman-zaman pozitiv bəyanatlar səsləndirilsə də, indiyədək konkret nəticələr müşahidə olunmayıb. Bu kontekstdə Roma papasının münaqişənin həllinin çətin olduğu barədə fikirləri müəyyən mənada reallığı əks etdirir. Lakin mövcud geosiyasi şərait və tərəflərin sərt mövqeləri fonunda Vatikanın, xüsusilə də katolik dünyasının liderinin pravoslav ənənəsinə mənsub iki dövlət arasında gedən münaqişədə həlledici diplomatik rol oynaya biləcəyinə dair gözləntilər inandırıcı görünmür".
Ayhan
09:31 24.02.2026
Oxunuş sayı: 631
