ABŞ və Çin arasında rəqabət yeni mərhələyə keçir
ABŞ ilə Çin arasında Afrikanın zəngin faydalı qazıntıları uğrunda rəqabət getdikcə kəskinləşir.
Crossmedia.az xəbər verir ki, bu barədə "Röyters" agentliyi məlumat yayıb.
Qeyd olunub ki, tərəflər xüsusilə mis, kobalt və digər strateji mineralların tədarükü uğrunda açıq iqtisadi mübarizə aparırlar.
Məlumata görə, bu minerallar elektrik avtomobilləri, yüksək texnologiyalar və müdafiə sənayesi üçün həyati əhəmiyyət daşıyır. Çin uzun illərdir Afrikada, xüsusən Konqo Demokratik Respublikası, Zambiya və Gvineyada iri mədən layihələrinə nəzarət edir və çıxarılan xammalın böyük hissəsini öz emal sənayesinə yönəldir.
ABŞ isə Çinin dominant mövqeyini zəiflətmək üçün regionda fəallığını artırıb. Vaşinqton birbaşa mədənlərə nəzarət etməkdən daha çox, sərmayə yatırımı, offtake (öncədən alqı-satqı) sazişləri, maliyyə və ticarət mexanizmləri vasitəsilə Afrika ölkələri ilə əməkdaşlıq qurmağa çalışır.
Qeyd olunub ki, ABŞ-nin əsas məqsədi strateji mineralların tədarükündə Çindən asılılığı azaltmaq və alternativ mənbələr formalaşdırmaqdır. Bu rəqabət hərbi qarşıdurma xarakteri daşımır, lakin qlobal iqtisadi və geosiyasi balans üçün ciddi əhəmiyyət kəsb edir.
Ekspertlərin fikrincə, Afrikanın faydalı qazıntıları uğrunda ABŞ–Çin qarşıdurması yaxın illərdə daha da dərinləşə və qlobal tədarük zəncirlərinə ciddi təsir göstərə bilər.
14:04 09.02.2026
Oxunuş sayı: 465
