XƏBƏRDARLIQ: İsrail bütün region üçün təhlükəyə çevrilib
HƏMAS lideri Xalid Məşəl İsrailin siyasətini sərt tənqid edərək bildirib ki, problem yalnız Fələstinin işğalı və fələstinlilərə qarşı hücumlarla məhdudlaşmır.
Crossmedia.az bu barədə xarici mediaya istinadən xəbər verir.
Onun sözlərinə görə, artıq İsrailin bütün Yaxın Şərq regionu üçün ciddi təhlükəyə çevrildiyi açıq şəkildə görünür.
Məşəl qeyd edib ki, İsrailin yalnız ona qarşı vuruşanları hədəf alması ilə bağlı iddialar reallığı əks etdirmir. O, Suriyanı nümunə göstərərək bildirib ki, ölkədə yeni siyasi reallıq formalaşmağa başlayarkən İsrail düşməncəsinə addımlar atıb. Bu addımlar təkcə sərhədlərlə məhdudlaşmayıb, Colan təpələri, Hərmon dağı və Dəməşq ətrafını da əhatə edib.
HƏMAS liderinin sözlərinə görə, İsrail Suriyanın vahid və güclü dövlət kimi mövcud olmasını istəmir, ölkəni silahsızlaşdırmaq və daxili sosial quruluşuna müdaxilə etməyə çalışır. O vurğulayıb ki, İsrail Suriyada kürdlər, dürzilər, ələvilər və parçalanmış icmaların mövcud olduğu zəif və bölünmüş bir mənzərəni üstün tutur.
Xalid Məşəl regionun digər ölkələri ilə bağlı da fikirlərini bölüşüb. O, İordaniyanın əsas təhlükə ilə İordan çayının qərb sahilində baş verən zorakı köçürmə planları fonunda üzləşdiyini bildirib. Misirlə bağlı isə qeyd edib ki, İsraillə sülh sazişi imzalamasına baxmayaraq, İsrail rəhbərliyi bu gün açıq şəkildə Misir ordusunun gücündən narahatlıq ifadə edir.
Məşəl Türkiyə ilə bağlı danışarkən İsrailin əvvəl “şiə oxu”, indi isə Türkiyə, Suriya və siyasi islamı əhatə edən “sünni oxu” anlayışını gündəmə gətirdiyini vurğulayıb. Səudiyyə Ərəbistanının alternativ ticarət və dəniz dəhlizləri üzərindən təzyiqə məruz qaldığını, Qətərin isə vasitəçilik səylərinə və Fələstinlə bağlı ədalətli mövqeyinə baxmayaraq İsrail tərəfindən düşmənçilik kampaniyaları ilə üzləşdiyini bildirib.
Məşəlin açıqlamaları regionda artan gərginlik və təhlükəsizlik riskləri fonunda diqqət çəkən siyasi mesaj kimi qiymətləndirilir.
10:20 09.02.2026
Oxunuş sayı: 384
