Azərbaycan–Özbəkistan əlaqələri güclənir: təhsil sərgisi iki qardaş ölkəni daha da yaxınlaşdırır
Bu gün Azərbaycanda İkinci Təhsil Sərgisi keçirilir. Tədbir çərçivəsində müxtəlif ölkələrdən gələn nümayəndələr təhsil və əməkdaşlıq imkanlarını müzakirə ediblər. Sərgi Azərbaycan və Özbəkistan arasında münasibətlərin inkişafında mühüm rol oynayır. Qardaş ölkələr arasında əlaqələrin genişlənməsi xüsusilə gənclər üçün yeni imkanlar yaradır. Mövzu ilə bağlı yazıçı və ictimai xadim Yunus Oğuzun fikirlərini öyrəndik.
Mövzu ilə bağlı, Yunus Oğuz Crossmedia.az-a açıqlamasında bildirib ki, Azərbaycan və Özbəkistanın bir-birinə yaxınlaşması çox müsbət və proqresiv tendensiyadır. Onun sözlərinə görə, hər iki ölkə Türk Dövlətləri Təşkilatına daxildir və bu birlik münasibətlərin daha da möhkəmlənməsinə şərait yaradır.
O qeyd edib ki, əlaqələr təkcə dövlət səviyyəsində deyil, cəmiyyətlər arasında da inkişaf etməlidir: “İnsanlar turizmdə, ali təhsildə, biznesdə və digər sahələrdə bir-biri ilə qaynayıb qarışmalıdır. Belə tədbirlərin həm Azərbaycanda, həm də Özbəkistanda keçirilməsi çox təqdirəlayiqdir. Çünki insanlar yaxınlaşdıqca dövlətlər də güclənir.”
Yunus Oğuz vurğulayıb ki, xalqlar arasında münasibətlərin yaxşılaşması dövlətlərin inkişafına birbaşa təsir göstərir: “Biz qohum xalqlarıq və bu xalqları bir-birindən küsdürmək olmaz. Ona görə də bu cür tədbirlər çox vacibdir.” O, gənclərin maariflənməsi mövzusuna da toxunaraq bildirib ki, Özbəkistandan gələn turistlər, media nümayəndələri, alimlər və tələbələr Qarabağa səfər edirlər. Müharibədən sonra bölgənin inkişafını görən qonaqlar sənədli filmlər çəkir, məqalələr yazır, hətta Qarabağ haqqında mahnılar bəstələyirlər.
Müsahibin sözlərinə görə, qarşılıqlı səfərlər və investisiyalar Azərbaycan–Özbəkistan münasibətlərini daha da möhkəmləndirir və iki dövlət arasında dostluq əlaqələrini gücləndirir.
Qeyd edək ki, Özbəkistanın Ali təhsil ocaqlarının müəllim və professor heyəti ötən gündən ölkəmizə səfər etmiş və 31 yanvar 2026-cı il tarixində keçiriləcək Özbəkistan universitetlərinin II Təhsil Sərgisində iştirak edirlər.
Xatırladaq ki, sərgi Özbəkistan Respublikası Ali Təhsil Nazirliyi, Özbəkistanın Azərbaycandakı Səfirliyi ilə birgə Azərbaycan Milli Elmlər Akademiyası və CrossMedia.az saytının dəstəyi ilə həyata keçirilir.
Fidan Bəhmənli
12:24 31.01.2026
Oxunuş sayı: 527
