Prorektor: Özbəkistan və Azərbaycan təhsil sahəsində əməkdaşlığı genişləndirir
Özbəkistan və Azərbaycan ali təhsil sahəsində tərəfdaşlıq əlaqələrini genişləndirir.
Bunu Crossmedia.az-a açıqlamasında Bakıda səfərdə olan Özbəkistan Jurnalistika və Kütləvi Kommunikasiyalar Universitetinin prorektoru Rayimjanov Ravşan Zakiroviç deyib.
Onun sözlərinə görə, Ingla School Baku ETC ilə tərəfdaşlıq əlaqələri iki il əvvəl qurulub: "Ötən il Özbəkistanın ali təhsil müəssisələrinin ilk beynəlxalq sərgisi təşkil olunarkən, universitet ilk dəfə bu tədbirdə iştirak edib və əməkdaşlıq memorandumu üzrə işlərə başlanılıb. Bu il biz memorandumu yenidən imzaladıq. Sənəd Azərbaycan tələbələrinin Özbəkistanın ali təhsil müəssisələrində təhsil alması üçün əməkdaşlığın inkişafını nəzərdə tutur”.
Rayimjanov vurğulayıb ki, təhsil sahəsində tərəfdaşlıq uzunmüddətli prosesdir və bir neçə il sistemli iş tələb edir: "Hazırda Özbəkistanda Azərbaycandan olan bir magistr və bir doktorant təhsil alır. Cari il üçün əsas məqsəd tərəfdaşlıq əlaqələrinin genişləndirilməsi və azərbaycanlı tələbələrin Özbəkistan universitetlərinə marağının artırılmasıdır. İkinci məqsədimiz iki ölkənin universitetləri arasında əməkdaşlığın gücləndirilməsi, o cümlədən professor-müəllim heyətinin mübadiləsidir”.
O bildirib ki, bundan əlavə, Bakı Dövlət Universiteti, xüsusilə Jurnalistika fakültəsi ilə birgə magistrlər üçün ikili diplom (double degree) proqramının yaradılması üzərində iş aparılır: "Layihə üzrə praktiki işlər artıq başlayıb və ilk nəticələrin 2026-cı ilin sentyabrında əldə olunacağı gözlənilir".
Prorektorun sözlərinə görə, bu cür görüşlər və rektorlar forumları təhsil əlaqələrinin möhkəmlənməsinə xidmət edir və həm Özbəkistan, həm də Azərbaycan üçün faydalı olacaq.
Emil Bağızadə
16:44 30.01.2026
Oxunuş sayı: 898
