Suriya ilə SDF arasında atəşkəs razılaşması imzalandı
Suriya hökuməti ilə Suriya Demokratik Qüvvələri (SDF) arasında atəşkəsin elan edilməsi və hərbi-inzibati strukturların mərhələli şəkildə inteqrasiyasını nəzərdə tutan yeni razılaşma əldə olunub.
Crossmedia.az xəbər verir ki, bu barədə SANA agentliyi məlumat yayıb.
Razılaşmaya əsasən Suriyanın şimalında cəbhə xətlərində yerləşən silahlı qüvvələr geri çəkiləcək, Suriya Daxili İşlər Nazirliyinə bağlı təhlükəsizlik qüvvələri isə Həsəkə və Qamışlı şəhərlərinin mərkəzinə yerləşdiriləcək.
Sazişin əsas müddəalarına görə:
-
SDF ilə Suriya Hökuməti arasında atəşkəs elan olunur və tərəflər arasında hərbi və inzibati qüvvələrin mərhələli inteqrasiyası razılaşdırılır;
-
Təmas xəttindəki qüvvələr geri çəkilir, bölgədə təhlükəsizlik strukturlarının inteqrasiya prosesi başlanır;
-
SDF bazasında üç briqadadan ibarət hərbi diviziya yaradılır, Hələb əyalətində isə Kobani qüvvələri üçün ayrıca briqada formalaşdırılır;
-
Muxtar İdarəetmə qurumları Suriya dövlət strukturlarına inteqrasiya edilir, mülki işçilərin vəzifələrinin qorunması təmin olunur;
-
Kürd əhalisinin mülki və təhsil hüquqları tənzimlənir, məcburi köçkünlərin öz bölgələrinə qayıtmasına şərait yaradılır.
Razılaşmanın ölkədə təhlükəsizliyin möhkəmlənməsinə, əməkdaşlığın genişlənməsinə və Suriyanın yenidən qurulması prosesinə töhfə verəcəyi bildirilir. Tərəflər səylərini birləşdirərək Suriya ərazisinin birliyinin təmin olunmasını və bölgədə tam inteqrasiyaya nail olmağı hədəflədiklərini bəyan ediblər.
13:22 30.01.2026
Oxunuş sayı: 316
