ABŞ İran rəsmilərinin ailə üzvlərinə verilən imtiyazları ləğv edir
ABŞ İran hakimiyyətinin yüksək vəzifəli nümayəndələri və onların ailə üzvlərinə təqdim olunan imtiyazların ləğvi istiqamətində addımlar atmağa başlayıb. ABŞ Dövlət Departamenti dövlət katibi Marko Rubionun göstərişi ilə İran rəsmiləri və ailə üzvlərinin ABŞ-da qalmaq hüquqlarının yenidən nəzərdən keçirildiyini açıqlayıb.
Crossmedia.az xəbər verir ki, məsələ ilə bağlı ABŞ-nin BMT-dəki səfiri Mayk Uolts bildirib ki, İran daxilində əhali zorakılıq və sistemli təzyiqlərlə üzləşdiyi bir vaxtda, bəzi yüksək vəzifəli şəxslərin ailə üzvlərinin Amerikada rahat və rifahlı həyat sürməsi qəbuledilməzdir.
“İran xalqı ağır şəraitdə yaşayarkən, rejimə bağlı bəzi ailələrin ABŞ-də müxtəlif imtiyazlardan istifadə etməsi yolverilməzdir. Bu dövr artıq sona çatır”, – deyə Uolts vurğulayıb.
Eyni zamanda yayılan hesabatlarda ABŞ, Kanada və bir sıra Avropa ölkələrində yaşayan və ya həmin ölkələrin vətəndaşlığını əldə etmiş İran rəsmilərinin övladlarına dair geniş siyahının mövcud olduğu qeyd olunur.
Analitiklər bildirirlər ki, bu addımlar Vaşinqtonun İran hakimiyyətinə qarşı siyasi və diplomatik təzyiq mexanizmlərini daha da sərtləşdirməsinin göstəricisi kimi qiymətləndirilir.
11:21 30.01.2026
Oxunuş sayı: 520
