Diaspor

ABŞ-də peşəkar döyüş turniri keçirilib

ABŞ-nin Nyu York şəhərində fəaliyyət göstərən Amerika-Azərbaycan Gənclər və İdman Assosiasiyası və Birləşmiş Ştatların “CSE Combat” birliyinin təşkilatçılığı ilə “The Gauntlet” adlı çoxmərhələli peşəkar döyüş turniri keçirilib. Turnirdə ABŞ-nin tanınan MMA döyüşçüləri ilə yanaşı, bu ölkədə yaşayan azərbaycanlılar da iştirak ediblər.

Crossmedia.az xəbər verir ki, bu barədə Diasporla İş üzrə Dövlət Komitəsi məlumat yayıb.

Amerika-Azərbaycan Gənclər və İdman Assosiasiyasının rəhbəri, ABŞ-də yaşayan tanınan azərbaycanlı idmançı Elgün Xanoğlanlı bildirib ki, turnir ilk dəfə təşkil olunur və bu, rəhbərlik etdiyi qurumun ABŞ-də idman sahəsində həyata keçirdiyi ilk beynəlxalq layihədir.

Turnir çərçivəsində MMA və kikboksinq üzrə qarşılaşmalar da təşkil olunub. Hər çəki dərəcəsində səkkiz idmançının mübarizə apardığı yarış tək-məğlubiyyət sistemi üzrə keçirilib. İştirakçılar növbəti mərhələyə yüksəlmək uğrunda gərgin döyüşlərdə güclərini sınayıblar.

Qeyd edək ki, Amerika-Azərbaycan Gənclər və İdman Assosiasiyası 2023-cü ildə yaradılıb. Təşkilatın əsas məqsədi gənclərin səmərəli fəaliyyətinə dəstək göstərmək, onların akademik, peşəkar və şəxsi inkişafına töhfə vermək, eyni zamanda Azərbaycan mədəniyyətini, milli dəyərlərini və ölkəmizin həqiqətlərini yerli ictimaiyyətə çatdırmaqdır.