Gürcüstan qəzetində 20 Yanvar faciəsinə həsr olunan tədbir işıqlandırılıb
Gürcüstanın nüfuzlu “Sakartvelos Respublika” qəzetində Rustavi Təhsil və Mədəniyyət Mərkəzində 20 Yanvar faciəsinin 36-cı ildönümü ilə əlaqədar keçirilən anım tədbirindən bəhs edən “20 Yanvar soyqırımı ilə bağlı Rustavi şəhərində tədbir keçirilib” başlıqlı məqalə dərc olunub.
Crossmedia.az xəbər verir ki, bu barədə Diasporla İş üzrə Dövlət Komitəsi məlumat yayıb.
Yazıda mərkəzin rəhbəri Raidə Dərziyevanın çıxışına istinad edilərək 1990-cı il 20 Yanvar hadisələrindən dərhal sonra Ümummilli Lider Heydər Əliyevin Azərbaycanın Moskvadakı daimi nümayəndəliyində keçirdiyi mətbuat konfransı barədə məlumat verilib. Ulu Öndərin sovet qoşunlarının dinc əhaliyə qarşı törətdiyi vəhşiliyi kəskin şəkildə pislədiyi, bu hadisəni hüquqa, demokratiyaya və insanlığa zidd addım kimi qiymətləndirdiyi deyilib.
Məqalədə, həmçinin ziyalılar Rafiq Hümmət və Savalan Osmanlının çıxışlarında 20 Yanvar faciəsinin mahiyyətindən və tarixi-siyasi əhəmiyyətindən geniş bəhs etdikləri qeyd olunub. Tədbir çərçivəsində mərkəzin Azərbaycan dili bölməsinin şagirdlərinin ifasında ədəbi-bədii kompozisiyanın təqdim edildiyi və sonda 20 Yanvar şəhidlərinin xatirəsinə həsr olunmuş videoçarxın göstərildiyi də diqqətə çatdırılıb.
14:44 27.01.2026
Oxunuş sayı: 261
