AŞF ilin son iclasını keçirdi
Azərbaycan Şahmat Federasiyasının (AŞF) İcraiyyə Komitəsinin 2024-cü ildə son iclası keçirilib.
Crossmedia.az xəbər verir ki, iclasda AŞF tərəfindən hazırlanan şahmatçıların etik davranış qaydaları qəbul edilib.
Qısa zamanda dərc olunacaq etik davranış qaydaları şahmatçıların diqqətinə çatdırılacaq.
İclasda o cümlədən millilərin formalaşdırılması prinsipləri, yığma üzvlərinə və istedadlı şahmatçılara dəstək proqramının şərtləri, təqaüdlə bağlı meyarlar müzakirələrdən sonra təsdiq edilib.
AŞF-nin Məşqçilər Komissiyasının 2024-cü il üçün hesabatı dinlənilib. Məşqçilər Komissiyasının sədri Anar Allahverdiyev il ərzində məşqçi-müəllimlər üçün 3 səviyyə üzrə 8 fərqli qrupda təşkil edilən seminarlar barədə geniş məlumat verib.
Yeniyetmə və gənclərdən ibarət yığmanın baş məşqçisi, Uşaq-Gənclər Komissiyasının rəhbəri Fərid Abbasov il ərzində təşkil edilən yarışlar, uşaq və gənclərin hazırlıq prosesi, AŞF-nin nəzdində fəaliyyət göstərən Şahmat Akademiyasında dərslərin gedişatı barədə danışıb. Federasiya tərəfindən 2024-cü ildə uşaq və gənclərin dünya o cümlədən Avropa çempionatındakı nəticələri qeyri-qənaətbəxş hesab edilib, növbəti il üçün komissiyaya inkişafla bağlı təkliflərin hazırlanması tapşırılıb.
Sonda 2025-ci ildə keçiriləcək yarışların təşkilatı işləriylə bağlı tapşırıqlar verilib.
10:19 30.11.2024
Oxunuş sayı: 7066
