Mançester Universitetində Dünya Azərbaycanlılarının Həmrəylik Günü qeyd olunub
Mançester Universitetində 31 Dekabr – Dünya Azərbaycanlılarının Həmrəylik Gününə həsr olunan tədbir təşkil edilib.
Crossmedia.az bu barədə Diasporla İş Üzrə Dövlət Komitəsinə istinadən xəbər verir.
Tədbir Azərbaycan Respublikasının Diasporla İş üzrə Dövlət Komitəsinin dəstəyi və Mançester Universitetində fəaliyyət göstərən Azərbaycan Tələbə Cəmiyyətinin təşəbbüsü ilə baş tutub.
Tədbirdə Mançester şəhərində yaşayan azərbaycanlı və əcnəbi tələbələr iştirak ediblər.
Mançester Universitetində fəaliyyət göstərən Azərbaycan Tələbə Cəmiyyətinin rəhbəri Mirsaleh Məmmədov Dünya Azərbaycanlılarının Həmrəylik Gününün tarixi əhəmiyyətindən, xaricdə yaşayan soydaşlarımızın milli kimliyinin qorunması və birliyinin möhkəmləndirilməsindəki xüsusi rolundan danışıb. Bu cür tədbirlərin gənclərin milli-mənəvi dəyərlərə bağlılığını artırmaqla yanaşı, diaspor fəaliyyətinin gücləndirilməsinə də töhfə verdiyini vurğulayıb.
Tədbir çərçivəsində Azərbaycan tarixi, mədəniyyəti və milli adət-ənənələri haqqında məlumat verilib. Xarici tələbələr ölkəmizin zəngin mədəni irsi, multikultural dəyərləri və tolerant cəmiyyəti haqqında ətraflı məlumat əldə ediblər.
Sonda tələbələr arasında fikir mübadiləsi aparılıb, xatirə fotoları çəkdirilib.
20:45 22.12.2025
Oxunuş sayı: 996
