Litvada Azərbaycan Günü maraqla qarşılanıb
Litvanın “International House Vilnius” Xidmət və İnteqrasiya Mərkəzinin fəaliyyətə başlamasının 4 illiyi münasibətilə müxtəlif icmalar üçün xüsusi günlərin təşkili proqramı həyata keçirilir.
Crossmedia.az xəbər verir ki, bu proqram çərçivəsində növbəti tədbir Azərbaycan icmasının təşəbbüsü və adı çəkilən mərkəzin təşkilatçılığı ilə “Azərbaycan Günü” olub.
Tədbir iştirakçıları ölkəmizin mətbəxinə aid yeməklərin hazırlanması prosesində iştirak ediblər. Onlara Azərbaycanın tarixi, zəngin mədəni irsi haqqında məlumat verilib. Müxtəlif intellektual oyunlar keçirilib. Uşaqlar üçün nəzərdə tutulan xüsusi guşədə isə milli xalça naxışları ilə rəngləmə və digər yaradıcı fəaliyyətlər təşkil olunub. İnsanlar ölkəmizlə bağlı öz fikirlərini və xatirələrini bölüşüblər. Müxtəlif millətlərin nümayəndələri Azərbaycan mədəniyyətinə heyranlıqlarını ifadə ediblər.
Qeyd edək ki, “International House Vilnius” Litvanın paytaxtı Vilnüsə köçən xarici vətəndaşlar üçün yaradılmış rəsmi xidmət və inteqrasiya mərkəzidir.
Bu cür tədbirlər ölkəmizin mədəni irsini tanıdılması ilə yanaşı, beynəlxalq icmalar arasında dostluq və əməkdaşlıq əlaqələrinin gücləndirilməsinə də müsbət təsir göstərir.
17:30 05.12.2025
Oxunuş sayı: 1015
