Diaspor

Almaniyadakı Azərbaycan icmasının üzvləri ilə bu ölkənin elm xadimləri arasında dəyirmi masa təşkil olunub

Almaniyadakı Azərbaycan icmasının üzvləri ilə Şimali-Reyn Vestfaliya əyalətinin Miqrasiya və İnteqrasiya Məsələləri üzrə Dövlət Fondunun elm xadimləri arasında dəyirmi masa təşkil olunub.

Crossmedia.az xəbər verir ki, bu barədə Diasporla İş üzrə Dövlət Komitəsi məlumat yayıb.

Bildirilib ki, görüşdə “Almaniyanın azərbaycanlı məzunlarının iki ölkə arasında iqtisadi və mədəni münasibətlərin inkişafına töhfələri” mövzusunda müzakirələr aparılıb.

Almaniya Azərbaycanlıları Alyansının təşkilatçılığı ilə baş tutan dəyirmi masada diaspor nümayəndələrinin, Almaniyada təhsil alan azərbaycanlıların ölkələrarası iqtisadi və mədəni əməkdaşlığın inkişafındakı rolu diqqətə çatdırılıb. Bildirilib ki, Almaniyada yaşayan, həmçinin bu ölkənin müxtəlif ali təhsil müəssisələrini bitirən soydaşlarımız elmi tədqiqatlar, innovativ layihələr, eləcə də mədəni proqramlar vasitəsilə iki ölkə arasında bilik və təcrübə mübadiləsini zənginləşdirir, qarşılıqlı münasibətlərin inkişafına əhəmiyyətli töhfə verirlər.

Dəyirmi masada Azərbaycan Respublikasının Diasporla İş üzrə Dövlət Komitəsinin əməkdaşları da iştirak edib. Komitənin həyata keçirdiyi çoxşaxəli layihələr, o cümlədən Azərbaycan Evləri, Koordinasiya Şuraları, həftəsonu məktəbləri, ixtisaslaşmış forumlar və digər əsas fəaliyyət istiqamətləri barədə geniş təqdimat olub.

Görüş fikir mübadiləsinin aparılması, gələcək əməkdaşlıq imkanlarına dair təkliflərin səsləndirilməsi və almaniyalı elm xadimlərinə hədiyyələrin təqdim olunması ilə yekunlaşıb.