Mərkəzi Elmi Kitabxanadan “Konstitusiya və Suverenlik İli” münasibətilə yeni nəşr
Azərbaycan Milli Elmlər Akademiyasının (AMEA) Mərkəzi Elmi Kitabxanasının (MEK) tərtibatında “Azərbaycan Konstitusiyası və suverenlik” adlı biblioqrafik göstərici çapdan çıxıb.
Crossmedia.az-ın məlumatına görə, MEK-dən bildirilib ki, AMEA Rəyasət Heyətinin qərarına əsasən nəşr olunan biblioqrafiyada Azərbaycan Konstitusiyasına dair qanun və qərarlar, dərslik və monoqrafiyalar, eləcə də dövri mətbuatda dərc olunmuş elmi və publisistik məqalələr, dissertasiyalar və avtoreferatlar illər üzrə sistemləşdirilərək təqdim edilib. Göstəricidən istifadənin rahatlığını təmin etmək üçün iki dildə soraq-axtarış aparatı hazırlanıb.
Vəsaitin elmi məsləhətçisi AMEA-nın prezidenti akademik İsa Həbibbəylidir. Elmi redaktoru MEK-in direktoru texnika elmləri doktoru Hüseyn Hüseynov, tərtibçisi kitabxananın əməkdaşı, Əməkdar mədəniyyət işçisi Xuraman İsmayılova, redaktoru isə Biblioqrafiya şöbəsinin rəhbəri Aytən Əliyevadır.
Azərbaycan Respublikasında “Konstitusiya və Suverenlik İli” münasibətilə hazırlanmış bu nəşr ölkəmizin əsas qanununun qəbulundan ötən dövrdə hüquqi dövlət quruculuğu, insan hüquq və azadlıqlarının təminatı, eləcə də suverenliyin möhkəmləndirilməsi sahəsində görülən işləri əks etdirən dəyərli mənbə kimi əhəmiyyət daşıyır.
Mərkəzi Elmi Kitabxana bu nəşri ilə Azərbaycan Respublikasının Konstitusiyasının əhəmiyyətini vurğulayaraq tədqiqatçılar, hüquqşünaslar və gənc oxucular üçün etibarlı elmi məlumat bazası yaradıb.
Qeyd edək ki, MEK-in bu və digər nəşrləri kitabxananın elektron bazasına daxil edilərək oxucuların istifadəsinə verilib.
15:29 29.10.2025
Oxunuş sayı: 924
