Azərbaycan və Ukrayna arasında humanitar sahədə əməkdaşlıq kifayət qədər dinamikdir - Deputat
Azərbaycan ilə Ukrayna arasında humanitar sahədə inkişaf edən əməkdaşlıq münasibətləri yüksək qiymətləndirilir. İki ölkə arasındakı bu əməkdaşlıq təkcə humanist dəyərlərin təcəssümü olmaqla kifayətlənmir, həm də praktiki nəticələr verir: Ukraynanın bərpa işlərindən tutmuş, uşaqların reabilitasiyasına və enerji təminatına qədər müxtəlif sahələrdə Azərbaycan öz dəstəyini göstərir. Bu baxımdan, Azərbaycan humanitar siyasəti yalnız regionda deyil, dünya miqyasında da nüfuz qazanan bir təcrübə nümunəsi hesab olunur. Son məlumata görə Azərbaycan və Ukrayna İrpendə mədəniyyət obyektlərinin tikintisi ilə bağlı saziş imzalayacaqlar. Bu da iki ölkənin əlaqələrində daha bir mühüm göstərici sayıla bilər.
Maraqlıdır bu cür əlaqələr Azərbaycan-Ukrayna münasibətlərinə necə təsir edəcək və buna Rusiyanın reaksiyası necə olacaq?
Məsələ ilə bağlı Crossmedia.az-a açıqlama verən Milli Məclisin deputatı Azər Allahverənov Azərbaycan ilə Ukrayna arasında humanitar sahədə əməkdaşlığın kifayət qədər dinamik olduğunu qeyd edib: "Azərbaycan və Ukrayna arasında humanitar sahədə əməkdaşlıq kifayət qədər dinamikdir. Azərbaycan Ukraynaya bu sahədə geniş dəstək göstərir. Xüsusilə, Azərbaycan şirkətləri Ukrayna şəhərlərində bərpa və quruculuq işlərində yaxından iştirak edir. Bundan əlavə, Azərbaycanın humanitar təşəbbüsləri enerji sahəsində təhlükəsizliyin təmin olunmasına, dövlət qurumlarına məxsus nəqliyyat vasitələrinin yanacaqla təmin edilməsinə və digər sahələrə də şamil olunur.
Hər il yüzlərlə ukraynalı uşaq Azərbaycanda müxtəlif qurumlar tərəfindən təşkil olunan rehabilitasiya proqramlarında iştirak edir. Bu təşəbbüslər iki ölkə arasında humanitar münasibətlərin inkişafını göstərən və Azərbaycanın bu sahədəki dəstəyini nümayiş etdirən vacib nüanslardır. Dövlətlər arasında humanitar sahədə münasibətlərin inkişafı həm də bəşəriyyət tərəfindən yüksək qiymətləndirilir.
Azərbaycanın göstərdiyi humanitar dəstək yalnız Ukrayna ilə məhdudlaşmır. Ölkəmiz dünyada bir çox layihələrdə iştirak edərək nüfuz qazanıb. Məsələn, Vatikan muzeyində bərpa işləri, Pakistanda məktəb tikintisi və Karamanmaraşda Azərbaycan məhəlləsinin tikintisi kimi layihələr Azərbaycanın humanist siyasətini əks etdirir".
Deputat həmçinin Azərbaycanın humanitar sahədə həyata keçirdiyi siyasət və dəstəklərlə insanlıq nüfuzunu nümayiş etdirdiyini bildirib.
"Beləliklə, Azərbaycan humanitar sahədə həyata keçirdiyi siyasət və dəstəklərlə insanlıq nüfuzunu nümayiş etdirir və bir çox dövlətlər üçün örnək təşkil edir" - deyə o qeyd edib.
Elmir Heydərli
16:08 15.09.2025
Oxunuş sayı: 13568
