Şok iddia: Kreml Qarabağ separatçılarını gizli şəkildə tanklarla silahlandırıb
Rusiya dövlət mediasının – VGTRK və RİA “Novosti”nin analitik xidmətlərinin keçmiş rəhbəri, hazırda beynəlxalq təhlükəsizlik üzrə ekspert İqor Nikolayçuk sensasion etirafla çıxış edib. O bildirib ki, Moskva Qarabağdakı separatçıları birbaşa ağır texnika ilə təmin edib.
Crossmedia.az xarici KİV-ə istinadən xəbər verir ki, onun sözlərinə görə, Qarabağ müharibəsinin əvvəlində Rusiya Prezidenti Boris Yeltsin şəxsən göstəriş verərək, Armavirdən 50 tankın gizli şəkildə erməni separatçılarına göndərilməsini tapşırıb. Hətta həmin dövrdə müdafiə naziri olmuş İqor Rodionov belə bu “qeyri-rəsmi transfer”ə etiraz edib.
Nikolayçukun sözlərinə görə, Kremlin seçimi Ermənistanın tərəfində olub və Azərbaycan maraqları bilərəkdən nəzərə alınmayıb:
“Ermənilər Rusiya üçün daxili və xarici siyasətdə əlverişli alət idi, azərbaycanlılar isə yox”.
Ekspertin bu açıqlaması xüsusi diqqət çəkir, çünki söhbət sıravi politoloqdan deyil, illərlə Kremlin təbliğat maşınının içində işləmiş bir şəxsdən gedir.
Beləliklə, Nikolayçuk faktiki olaraq təsdiqləyib ki, Rusiya separatçıları silahlandıraraq Cənubi Qafqazda müharibəni alovlandırıb və Ermənistanı öz siyasətində “piyada”ya çevirərək Azərbaycan üçün faciə yaradıb.
17:26 14.09.2025
Oxunuş sayı: 1385
