Azərbaycan, Türkiyə , Qətər, Özbəkistan, Pakistan və Qazaxıstan "Turan Ordusu" qurur -AÇIQLAMA
Azərbaycan, Türkiyə , Qətər, Özbəkistan, Pakistan və Qazaxıstan xüsusi təyinatlılarının iştirakı ilə keçirilən "Sonsuz qardaşlıq - IV" çoxmillətli birgə təlimi davam edir.
Dünyada müharibələrin davam etdiyi, ölkələrin hərbi xərclərə milyardlarla vəsait ayırdığı bir dövrdə Azərbaycan, Türkiyə, Pakistan, Qazaxıstan, Özbəkistan və Qətərin xüsusi təyinatlı qüvvələrinin birgə təlimi diqqət çəkib. Təlimlərin həm siyasi, həm hərbi, həm də strateji baxımdan mühüm bir hal olması isə danılmazdır.
Bəs ümumən bu cür təlimlərin nə kimi üstünlüyü var?
Məsələ ilə bağlı Crossmedia.az-a açıqlama verən hərbi ekspert Emin Həsənli bu cür təlimlərin həm siyasi, həm hərbi, həm də mənəvi-psixoloji baxımdan əhəmiyyətinin olduqca böyük olduğunu qeyd edib:
"Bu təlimlərin həm siyasi, həm hərbi, həm də mənəvi-psixoloji baxımdan əhəmiyyəti olduqca böyükdür. Hamımız bilirik ki, çox ağır bir dövrdə, çətin bir zamanda yaşayırıq. Təəssüf ki, bu gün dünyanın müxtəlif bölgələrində ağır müharibələr davam edir, milyonlarla insan həyatını itirir.
Bundan əlavə, indiki dövr həm də dünyada hərbi sahəyə, silahlı qüvvələrə ən çox maliyyə vəsaitinin ayrıldığı dövrdür. Bir çox ölkələr silahlı qüvvələrinin güclənməsinə milyardlarla vəsait sərf edirlər.
Belə bir zamanda Azərbaycan, Qazaxıstan, Qətər, Özbəkistan, Pakistan və Türkiyə xüsusi təyinatlılarının birgə təlimi həm qardaşlıq rəmzi, həm də böyük əhəmiyyət daşıyan hadisədir. Bu təlimlər dünyaya mesaj verir ki, gələcəkdə bu ölkələrin orduları koordinasiya olunmuş şəkildə fəaliyyət göstərə, hətta Turan Ordusunun qurulması və ona müttəfiq qüvvələrin qoşulması mümkündür. Bu da regionu dünya üçün ən mühüm güc mərkəzlərindən birinə çevirə bilər.
Xüsusilə Türkiyə, Pakistan və Azərbaycanın güclü orduları var. Azərbaycan Ordusu 44 günlük Vətən müharibəsində və 1 günlük antiterror tədbirlərində öz gücünü göstərdi. Türkiyə Ordusu ölkə daxilində və qonşu ölkələrdə terrora qarşı mübarizədə daim hazırlıqlı olduğunu sübut edib. Pakistan Ordusu isə uzun illərdir müharibə təcrübəsinə malikdir. Bu ölkələrin birgə təlimi onu göstərir ki, gələcəkdə hər hansısa bir dövlətin müstəqilliyinə, maraqlarına və ya ərazi bütövlüyünə qəsd edilərsə, bu ordular birgə, koordinasiyalı şəkildə həm siyasi, həm iqtisadi, həm də hərbi dəstək göstərəcəklər.
Bu baxımdan təlimlər çox önəmlidir. Onlar həm orduların güclənməsinə, həm qarşılıqlı koordinasiyanın möhkəmlənməsinə, həm də təcrübə mübadiləsinə böyük töhfə verir. Bilirsiniz ki, müharibədən sonrakı ən mühüm mərhələ təlimlərdir. Çünki məhz təlimlərdə hərbçilər qazandıqları bilik və bacarıqları tətbiq edərək təcrübələrini möhkəmləndirirlər.
Azərbaycan hər zaman belə birgə təlimlərdə fəal iştirak edib və seçilib. Pakistanın nüvə imkanları, Türkiyənin böyük döyüş hazırlığı, Azərbaycanın isə həm döyüş təcrübəsi, həm də strateji coğrafi mövqeyi xüsusi əhəmiyyət kəsb edir. Afrikadan Avrasiyaya qədər geniş bir coğrafiyanı əhatə edən bu əməkdaşlıq zamanla daha da genişlənəcək və iştirakçı ölkələrin sayı artacaq".
Ekspert həmçinin bu proses nəticəsində NATO, Rusiya və Çin kimi mövcud güc mərkəzlərinin qarşısına dördüncü bir güc mərkəzi çıxacağını bildirib.
"Beləliklə, bu proses nəticəsində NATO, Rusiya və Çin kimi mövcud güc mərkəzlərinin qarşısına dördüncü bir güc mərkəzi çıxacaq. Bu artıq göz önündədir və sevindirici haldır. Əminəm ki, bu güc mərkəzi formalaşdıqdan sonra dünyada haqq və ədalətin bərqərar olmasına mühüm töhfə veriləcək"-deyə o qeyd edib.
Elmir Heydərli
13:12 13.09.2025
Oxunuş sayı: 6664
