Proqnoz: Azərbaycan Ukrayna əlaqələri daha da genişlənə bilər
Azərbaycanın energetika naziri Pərviz Şahbazov Ukraynanın energetika naziri Svetlana Qrinçuk ilə onlayn görüş keçirib. Tərəflər ikitərəfli enerji əməkdaşlığının gündəliyindəki məsələləri və Bakıda keçirilmiş 13-cü iclasda əldə olunmuş razılaşmaların icrasını müzakirə ediblər.
Bu görüş Azərbaycan–Ukrayna enerji sahəsində əməkdaşlığın davamlılığını göstərir. Razılaşmaların icrasına yönəlmiş addımlar tərəflərin qarşılıqlı etimadını gücləndirir. Eyni zamanda, bu əməkdaşlıq regionda enerji təhlükəsizliyinin möhkəmlənməsinə töhfə verə bilər.
Mövzu ilə bağlı ReAL Partiyasının sədri, iqtisadçı Natiq Cəfərli Crossmedia.az saytına açıqlama verib.
N.Cəfərli Azərbaycan ilə Ukrayna arasında enerji əməkdaşlığı tarixinin bir neçə onilliklər əhatə etdiyini bildirib:
“Azərbaycanla Ukrayna arasında enerji əməkdaşlığının tarixi qədimdir. Yəni Azərbaycanın ən böyük dövlət şirkəti olan SOCAR çoxdandır enerji sahəsində Ukraynada fəaliyyətdədir. Son zamanlar həm qaz həm elektrik enerjisinin təminatında Azərbaycan ilə Ukrayna arasında yeni müqavilələr bağlanır, yeni danışıqlar aparılır, yeni istiqamətlər müəyyənləşdirilir. Təbii ki, bu hər iki ölkənin maraqları çərçivəsindədir. Və gələcəkdə Ukraynanın qaz təminatında iştirakı, elektrik enerjisi istehsalı və paylaşmasında iştirakı Azərbaycan-Ukrayna əlaqələrini daha da genişləndirə bilər. Nəticə etibarilə bu hal hər iki ölkənin xeyrinədir. Yəni Azərbaycan da, Ukrayna da dövlət maraqları çərçivəsində əməkdaşlıqlarının davam etdirilməsində və qarşılıqlı maraq və gəlir götürə biləcəkləri sahələrdə əməkdaşlığın davam etdirilməsində maraqlıdırlar. Bu da iki ölkənin strateji hədəflərinə cavab verir”.
Nicat Rüstəmzadə
11:48 12.09.2025
Oxunuş sayı: 5634
