Strateji dialoq Cənubi Qafqazda davamlı sülh və əməkdaşlığı gücləndirir - Deputat
Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev Vaşinqtonda ABŞ dövlət katibinin müavini Kristofer Landau ilə görüşüb. Görüşdə Azərbaycan–ABŞ strateji münasibətləri və regional məsələlər ətrafında müzakirələr aparılıb.
Bu görüş Azərbaycan–ABŞ strateji dialoqunun davamlı xarakter aldığını göstərir. İkitərəfli münasibətlərin regional məsələlərlə paralel müzakirəsi tərəflərin əməkdaşlığı daha da dərinləşdirmək niyyətindən xəbər verir. Bu, xüsusən də regionda təhlükəsizlik və iqtisadi inteqrasiya baxımından önəmli addımdır.
Mövzu ilə bağlı Milli Məclisin deputatı, Ana Vətən Partiyasının sədr müavini Günay Ağamalı Crossmedia.az saytına açıqlama verib.
Deputat Azərbaycan–ABŞ münasibətlərində strateji əməkdaşlığın regional sabitlik və inkişaf üçün mühüm rol oynadığını bildirib:
“Azərbaycan Respublikasının Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyevin Vaşinqtonda ABŞ dövlət katibinin müavini Kristofer Landau ilə görüşü Azərbaycan–ABŞ münasibətlərində yeni strateji əməkdaşlıq mərhələsinin formalaşmasının bariz nümunəsidir.
Hikmət Hacıyevin Kristofer Landau ilə görüşü cənab Prezident İlham Əliyevin tarixi Vaşinqton səfərinin məntiqi davamıdır. Donald Tramp sələfi Baydendən fərqli olaraq perspektivləri lazımı səviyyədə qiymətləndirir və Cənubi Qafqazda Azərbaycanın həlledici rolunu ikitərəfli əməkdaşlığı genişləndirməklə sinxronlaşdırır.
Azərbaycanla ABŞ arasında strateji münasibətlərin dərinləşdirilməsi regional sabitlik və təhlükəsizlik baxımından mühüm nəticələr vəd edir. İlk növbədə, bu əməkdaşlıq Cənubi Qafqazda davamlı sülhün təmin olunmasına, iqtisadi və nəqliyyat layihələrinin daha geniş miqyasda reallaşdırılmasına töhfə verəcək. ABŞ kimi qlobal gücə malik dövlətin regiondakı proseslərdə ədalətli mövqeyi və Azərbaycanın suverenliyinə dəstəyi bölgədə dayanıqlı təhlükəsizlik arxitekturasının qurulması baxımından olduqca əhəmiyyətlidir".
"Digər tərəfdən, strateji dialoqun güclənməsi Azərbaycanla ABŞ arasında enerji, ticarət, innovasiya və təhsil sahələrində yeni əməkdaşlıq imkanlarının yaranmasına şərait yaradır. Bu isə ölkəmizin iqtisadi müstəqilliyini daha da möhkəmləndirəcək, eyni zamanda region xalqlarının rifahına xidmət edəcəkdir.
Azərbaycan hər zaman beynəlxalq tərəfdaşlıqda açıq, balanslaşdırılmış və qarşılıqlı hörmətə əsaslanan siyasət yürüdüb. ABŞ ilə strateji münasibətlərin dərinləşdirilməsi də məhz bu kursun davamı olaraq həm ikitərəfli əməkdaşlığın, həm də regional sabitliyin gücləndirilməsinə xidmət edəcəkdir”,- parlamentari əlavə edib.
Nicat Rüstəmzadə
11:46 12.09.2025
Oxunuş sayı: 1658
