“Azərbaycan-Pakistan münasibətləri həm regional, həm də beynəlxalq səviyyədə böyük perspektivlər vəd edir”- RƏY
Azərbaycanın xarici işlər naziri Ceyhun Bayramov Pakistan Baş nazirinin müavini və xarici işlər naziri İshaq Darla telefon danışığı aparıb. Danışıqlar zamanı tərəflər regiondakı vəziyyəti, ikitərəfli əməkdaşlığı və ŞƏT Sammiti çərçivəsində Azərbaycan Prezidenti İlham Əliyev ilə Pakistan Baş naziri Şahbaz Şərifin görüşünün nəticələrini müzakirə ediblər.
Azərbaycan və Pakistan xarici işlər nazirləri regiondakı vəziyyət və ikitərəfli əməkdaşlığın dərinləşdirilməsi mövzusunda fikir mübadiləsi aparıblar. Telefon danışığı, ŞƏT Sammiti çərçivəsində liderlərin görüş nəticələrinin izlənməsi baxımından da önəmli olub. Bu, iki ölkə arasında strateji tərəfdaşlığın gücləndirilməsinə töhfə verə bilər.
Mövzu ilə bağlı Ana Vətən partiyasının sədri Fəzail Ağamalı Crossmedia.az saytına açıqlama verib.
F.Ağamalı Azərbaycan-Pakistan münasibətlərinin böyük perspektivi olduğunu bildirib:
“Pakistanla Azərbaycan arasında münasibətlərin yüksək səviyyədə qurulması hər iki xalqın və dövlətin iradəsinə söykənir. Qarşılıqlı etimad, qarşılıqlı əməkdaşlıq və yüksək münasibətlər zəminində inkişaf edən Azərbaycan-Pakistan münasibətlərinin böyük perspektivi var. Bu münasibətlərin yüksək səviyyədə qurulması Azərbaycanı həm regionda, həm də beynəlxalq səviyyədə mövqelərinin güclənməsində olduqca ciddi rol oynayır. Mən əminəm ki, bu və buna bənzər danışıqlar dövlət başçımız İlham Əliyev ilə Pakistan baş naziri arasında münasibətləri, orada hakimiyyət dəyişikliyi olmasına baxmayaraq, inkişaf etdirir. Heç şübhəsiz ki, münasibətlərin inkişafına yeni töhfələr verir. Və bu münasibətlərin yüksək səviyyədə qurulması şübhəsiz ki, həm Pakistanın, həm də Azərbaycanın istər regional məsələlərin həllində, istərsə də beynəlxalq miqyasda bu və digər problemlərin həllində öz rolunu oynayır”.
Nicat Rüstəmzadə
19:49 11.09.2025
Oxunuş sayı: 849
