Türkdilli ölkələr "yaşıl maliyyə" platformasını işə salmağı planlaşdırır
Türkdilli ölkələr əməkdaşlıq, məlumat mübadiləsi və layihələrin inkişafı üçün rəqəmsal mərkəzə çevriləcək "yaşıl maliyyə" platformasını işə salmağı düşünür.
Crossmedia.az xəbər verir ki, bu barədə Türkdilli Ölkələrin
Yaşıl Maliyyə Şurasının Qazaxıstanın Astana şəhərində keçirilən Birinci Təsis
Toplantısının yekunları üzrə imzalanmış kommünikedə deyilir.
İclasda Azərbaycanı Mərkəzi Bankın baş direktoru Şahin
Mahmudzadə təmsil edib.
Qeyd olunur ki, qəbul edilmiş kommünike üzv dövlətlərin
"Türk Dünyasına Yaşıl Baxış"a sadiqliyini və onların "yaşıl
maliyyə" sahəsində regional əməkdaşlığın dərinləşdirilməsinə diqqət
yetirdiyini təsdiq edir. Sənəddə "yaşıl" maliyyə alətlərinin
inkişafı, dayanıqlı maliyyə strategiyaları və taksonomiyalarının işlənib
hazırlanması, həmçinin əməkdaşlığın genişləndirilməsi, təcrübə mübadiləsi və
biliklərin ötürülməsinin asanlaşdırılmasının vacibliyi vurğulanır.
Xatırladaq ki, Türkdilli Ölkələrin Yaşıl Maliyyə Şurası
2024-cü il noyabrın 6-da Bişkekdə keçirilən XI TDT Sammitində imzalanmış
Anlaşma Memorandumu əsasında dayanıqlı maliyyə sahəsində əməkdaşlığı təşviq etmək
məqsədilə yaradılıb. Yeni platforma kimi Şura üzv təşkilatlara ekoloji, sosial
və idarəetmə (ESG) amillərini nəzərə alaraq investisiyaları təşviq edərək
"yaşıl" və davamlı maliyyənin inkişafı üçün məsləhət və ekspert dəstəyi
verir.
20:23 09.09.2025
Oxunuş sayı: 5303
