Ceyhun Bayramov Aİ nümayəndəliyinin yeni təyin olunmuş rəhbərini qəbul edib
Azərbaycanın xarici işlər naziri Ceyhun Bayramov Avropa İttifaqının (Aİ) ölkəmizdəki nümayəndəliyinin yeni təyin olunmuş rəhbəri Mariyana Kuyunciçi qəbul edib.
Crossmedia.az xəbər verir ki, bu barədə Azərbaycan Xarici
İşlər Nazirliyi məlumat yayıb.
Məlumata görə nümayəndəliyin rəhbəri Mariyana Kuyunciç təyinatı
ilə əlaqədar məktubu nazir Ceyhun Bayramova təqdim edib.
Ceyhun Bayramov Mariyana Kuyunciçi təyinatı münasibətilə təbrik
edib, ona ölkəmizdəki fəaliyyətində uğurlar arzulayıb.
Görüş zamanı Azərbaycan-Aİ arasında müxtəlif, o cümlədən
siyasi, iqtisadi, enerji, nəqliyyat-kommunikasiyalar, humanitar və s. istiqamətlər
üzrə əməkdaşlıq məsələləri ətrafında fikir mübadiləsi aparılıb.
Ölkəmizin Aİ ilə həyata keçirilən birgə enerji layihələrinin
əhəmiyyəti vurğulanıb. Digər əhəmiyyətli istiqamətlər üzrə əməkdaşlığın inkişaf
etdirilməsinə maraq ifadə olunub.
Nazir, həmçinin qarşı tərəfi postmünaqişə dövründə bölgədə
mövcud vəziyyət və reallıqlar barədə ətraflı məlumatlandırıb.
Ölkəmizin təşəbbüsü ilə başladılan sülh gündəliyinin irəlilədilməsində
Vaşinqton görüşü çərçivəsində əldə olunmuş razılıqlar, sülh müqaviləsinin
paraflanması, keçmiş münaqişənin qalığı olan ATƏT-in Minsk prosesi və əlaqəli
strukturların ləğvi ilə bağlı qərarın əhəmiyyəti qeyd olunub.
Nümayəndəliyin rəhbəri Mariyana Kuyunciç qəbula görə təşəkkürünü
bildirərək, fəaliyyəti müddətində Azərbaycan-Aİ gündəliyinin irəlilədilməsi
istiqamətində səylərini əsirgəməyəcəyini qeyd edib.
Görüş zamanı, həmçinin qarşılıqlı maraq doğuran digər məsələlər
ətrafında fikir mübadiləsi aparılıb.
18:51 09.09.2025
Oxunuş sayı: 6104
