"Gürcü Arzusu" Salome Zurabişvili və Tinatin Xidaşelini vətənə xəyanətdə ittiham etdi
Hakim “Gürcü Arzusu” partiyası ölkənin beşinci prezidenti Salome Zurabişvili və keçmiş müdafiə naziri Tinatin Xidaşelini “vətənə xəyanətdə” ittiham edib.
Crossmedia.az xəbər verir ki, səbəb onların 10 sentyabrda keçiriləcək Helsinki Komissiyasının dinləmələrinə dəvət edilməsidir. Bu dinləmələr “Gürcüstanın antiamerikan yolu” mövzusuna həsr olunub.
“İki insan canlı yayımlarda vətənə xəyanət aktı həyata keçirmək üçün gedir,” – deyə Gürcüstan parlamentinin spikeri Şalva Papuaşvili bu gün jurnalistlərə bildirib.
O, Zurabişvilini “xaricilərin maaşında olan McCain İnstitutunun stipendiatı” adlandırıb. Xidaşelini isə, hazırda “Vətəndaş Fikri” QHT-sini təmsil edən keçmiş naziri, “Tayvan separatçı rejiminin maliyyələşdirilməsi üçün antiçin əhval-ruhiyyəsi yaratmaqda” ittiham edib.
Papuaşvilini parlamentin vitse-spikeri Georgi Volski də dəstəkləyib: “Salome Zurabişvili və ya Tinatin Xidaşelinin etdikləri iş vətənə və siyasi prinsiplərə hörmətsizlikdir. Bu, birbaşa ölkəyə xəyanətdir.”
“Gürcü Arzusu” deputatı və Avrointeqrasiya üzrə parlament komitəsinin sədri Levan Maxaşvili yaxınlaşan iclası “sirk” adlandırıb. Komissiyanın rəhbəri, Respublikaçı konqresmen Co Uilsonu isə Gürcüstanda inqilabi ssenariləri dəstəkləməkdə ittiham edib.
Baş nazir İrakli Kobaxidze həm Helsinki Komissiyasının rəhbərliyini, həm də Zurabişvili ilə Xidaşelini “Deep State” ilə əlaqədə olmaqda ittiham edib.
“Tülkü öz quyruğunu şahid gətirib. Bütün bunlar absurddur,” – deyə Kobaxidze bildirib.
Niyaz Hacıyev
14:55 05.09.2025
Oxunuş sayı: 906
