Pentaqonun sistemləri süni intellekt dövründə hakerlər qarşısında zəifləyib
ABŞ Pentaqonunun köhnəlmiş kompüter şəbəkələri süni intellektin yaratdığı yeni kiber təhdidlər fonunda ciddi risklərlə üzləşib.
Crossmedia.az xəbər verir ki, “The Washington Post” bu barədə məlumat yayıb.
Nəşrin məlumatına görə, ABŞ Müdafiə Nazirliyinin sistemlərində hakerlərin “zero-day” hücumlarında istifadə edə biləcəyi zəifliklərin sayı son dövrdə təxminən 10 dəfə artıb. Süni intellekt aşağı səviyyəli proqram təminatı boşluqlarını daha sürətlə müəyyənləşdirməyə və onları daha mürəkkəb kiberhücumlarda birləşdirməyə imkan verir.
Pentaqonun kibermüdafiə üzrə rəsmisi, general-leytenant Paul Stanton bildirib ki, qurum son üç onillikdə kompüter şəbəkələrinin və məlumat sistemlərinin modernləşdirilməsini kifayət qədər prioritet hesab etməyib. Onun sözlərinə görə, sistemlərin texniki xidmət və yenilənməsinin uzun müddət təxirə salınması hazırda ciddi risklər yaradır.
Ekspertlər bildirirlər ki, köhnəlmiş sistemlərin yenilənməsi vaxt tələb edir və süni intellektin sürətli inkişafı fonunda ABŞ-nin müdafiə şəbəkələrinin kiberhücumlara qarşı daha həssas olması milli təhlükəsizlik üçün risk yaradır.
20:36 17.09.2026
Oxunuş sayı: 48
