Ermənistan hökuməti Vaşinqtonda Ermənistanın baş naziri Nikol Paşinyan və ABŞ-ın sabiq prezidenti Donald Tramp arasında keçirilmiş görüş çərçivəsində imzalanmış memorandumlardan ibarət sənədləri dərc edib.
Crossmedia.az xarici KİV-ə istinadən xəbər verir ki, birinci memoranduma əsasən, ABŞ və Ermənistan hökumətləri Ermənistanın suverenliyinə, ərazi bütövlüyünə və beynəlxalq səviyyədə tanınmış sərhədlərinin toxunulmazlığına qəti dəstəklərini ifadə edir və "Sülh Çatqısı" (Crossroads of Peace) layihəsinə sərmayə qoymaqda qarşılıqlı maraqlı olduqlarını bildirirlər. Layihə çərçivəsində Ermənistanın infrastrukturunun və sərhəd təhlükəsizliyinin yaxşılaşdırılması, o cümlədən qarşılıqlı investisiyalar və kadrların yenidən hazırlanması nəzərdə tutulur.
Digər məqsəd – gömrük nəzarətinin effektivliyinin artırılması sahəsində əməkdaşlıqdır. Buna qaçaqmalçılıqla və sərhədi qanunsuz keçmə ilə mübarizə də daxildir. Tərəflər ABŞ-ın Daxili Təhlükəsizlik Departamenti (xüsusilə onun Gömrük və Sərhəd Mühafizəsi Xidməti) ilə Ermənistanın Milli Təhlükəsizlik Xidməti sərhəd qoşunları və Dövlət Gəlirləri Komitəsi arasında təcrübə mübadiləsinə hazır olduqlarını bildiriblər. Buraya kibertəhlükəsizlik sahəsində əməkdaşlıq da daxildir.
Enerji təhlükəsizliyi üzrə tərəfdaşlıq memorandumu çərçivəsində tərəflər dinc atom enerjisi sahəsində, o cümlədən kiçik modullu reaktor texnologiyalarında əməkdaşlığı genişləndirməyə hazır olduqlarını bəyan ediblər.
Həmçinin, elektrik enerjisi bazarında islahatların davam etdirilməsi və enerji resurslarının beynəlxalq ticarətinin inkişafı planlaşdırılır. Digər prioritet isə Ermənistanın aşağı karbonlu enerji sisteminə keçidi, o cümlədən bərpa olunan enerji stansiyalarında batareyalardan istifadəni nəzərdə tutur.
Tərəflər, həmçinin, Ermənistanın xüsusi əhəmiyyətli enerji obyektlərinin mühafizəsinin gücləndirilməsi (o cümlədən onların kibertəhlükəsizliyinin artırılması) və ölkənin elektrik şəbəkələrinin modernləşdirilməsi sahəsində əməkdaşlıq niyyətini ifadə ediblər.
Süni intellekt və yarımkeçiricilər sahəsində əməkdaşlığa dair memoranduma əsasən, tərəflər dövlət-özəl tərəfdaşlıq formatında birgə layihələrin həyata keçirilməsi imkanlarını öyrənməyə, süni intellekt tətbiqlərinin işlənməsi sahəsində təcrübə mübadiləsini genişləndirməyə və yarımkeçirici texnologiyalar üzrə birgə elmi tədqiqatlar aparmağa (o cümlədən dövlətlərarası elmi fondun yaradılması ehtimalı ilə) hazır olduqlarını bildirirlər.
ABŞ hökuməti, həmçinin, öz dövlət qurumlarını və özəl şirkətləri süni intellekt və yarımkeçirici texnologiyaların Ermənistana ixracının təhlükəsizliyi barədə məlumatlandırmağa hazır olduğunu bildirib. Tərəflər bu texnologiyaların məqsəddən kənar istifadəsi risklərinə birgə nəzarət etməyə razılaşıblar.
Bütün memorandumların qüvvədəolma müddəti bir ildir və üç dəfə bir il müddətinə uzadıla bilər.
Tərəflər qəbul edirlər ki, memorandumlardakı müddəalar hüquqi baxımdan məcburi xarakter daşımır və onların həyata keçirilməsi hər iki ölkənin mövcud və gələcək hüquqi öhdəliklərinə zidd olmamalıdır.
Səbiyyə Zayirova
