Aİ neytral ölkədən Ukraynaya sülhməramlı göndərilməsini müzakirə edəcək
Avropa İttifaqı (Aİ) neytral ölkədən Ukraynaya sülhməramlı göndərilməsini müzakirə edəcək.
Crossmedia.az-ın məlumatına görə , bu barədə "Politico" nəşri diplomatlara istinadən xəbər verir.
Aİ-nin xarici işlər və müdafiə nazirləri Kopenhagendə keçiriləcək qeyri-rəsmi görüşdə Aİ və ya NATO üzvü olmayan neytral bir ölkədən Ukraynaya sülhməramlıların göndərilməsi imkanını müzakirə edəcəklər. Bu sülhməramlılar gələcək sərhəd və demilitarizasiya zonasını patrul edə bilərlər.
Qəzet qeyd edir ki, Ukrayna üçün təhlükəsizlik zəmanətləri də görüş çərçivəsində müzakirə olunacaq. Xüsusilə, nazirlər hansı neytral ölkənin bu potensial sülhməramlı missiyanı yerinə yetirə biləcəyini müzakirə edə bilərlər. Bununla belə, Politico vurğulayıb ki, görüş qeyri-rəsmi olduğuna görə, heç bir praktiki qərar qəbul edilməyəcək.
Avropa Parlamentinin Xarici Əlaqələr Komitəsinin sədri David McAllister də 29-30 avqust tarixlərində keçiriləcək nazir görüşünə dəvət olunub. O, Politico-ya bildirib ki, nazirləri münaqişənin diplomatik yolla həllinə baxmayaraq, Rusiyaya təzyiqləri artırmağa və sanksiyaların yumşaldılması əvəzinə, yenilərinin tətbiqi üzərində işləməyə çağıracaq.
Həmin görüşdə Avropa Komissiyası da nazirlərlə birlikdə Rusiyaya qarşı nəzərdə tutulan 19-cu sanksiya paketinin layihəsini müzakirə edəcək.
Zayirova Səbiyyə
14:30 28.08.2025
Oxunuş sayı: 775
