Türk Birliyinə yeni nəfəs: Azərbaycan-Türkmənistan-Özbəkistan əməkdaşlığı
Ötən həftə Azərbaycan, Cənubi Qafqaz, Mərkəzi Asiya və elə həm də dünya önəmli bir prosesə şahidlik etdi. Azərbaycan Prezidenti İlham Əliyevin də iştirak etdiyi, Türkmənistan və Özbəkistan liderlərinin də qatıldığı mühüm bir səfər, görüş, imzalanma mərasimi baş tutdu. Türkmənistanın Avaza şəhərində baş tutan bu görüş və İlham Əliyevin orada iştirakı, səsləndirdiyi bəyanatlar diqqətlə təhlil olunmaqdadır. Azərbaycan lideri ikinci dəfədir ki, bu şəhərə səfər edir. Bu faktın özü də Azərbaycanın Türkmənistana, qardaşlıq və müttəfiqlik münasibətlərinə verdiyi önəmi göstərir. Mərkəzi Asiyada və Türk Dünyasında öz yeri və xüsusi mövqeyi ilə seçilən Türkmənistanla münasibətlər Azərbaycan üçün mühüm əhəmiyyət kəsb edir. İki ölkə arasındakı əməkdaşlıqlar müxtəlif qurumlar və şəxslər arasındakı münasibətlərlə yanaşı Füzuli və Arxadağ kimi şəhərlərinin qardaşlaşması fonunda daha da möhkəmlənir.
Bu birliyə iki dövlətin liderlərinin şəxsi münasibətlərinin yüksək səviyyədə olması da təsir edir. İyul ayında Azərbaycana – Bakıya və Qarabağa səfər edən Türkmənistan Xalq Məsləhətinin sədri Qurbanqulu Berdiməhəmmədov yüksək səviyyədə qarşılanmışdı. Keçirilən görüşlərdən, verilən bəyanat və açıqlamalardan bəlli olurdu ki, hər iki dövlətin liderlərinin fikirləri üst-üstə düşür. Bu isə o demək idi ki, Türkmənistan və Azərbaycan iki qardaş ölkə kimi bundan sonra da çiyin-çiyinə irəliyə gedəcək, bütün məsələləri dostluq, qardaşlıq şəraitində həll edəcək və nəinki ikitərəfli, çoxtərəfli əməkdaşlıq imkanlarını da genişləndirəcək.
Qazaxıstan və Özbəkistandan sonra qardaş Türkmənistanın da Qarabağdakı quruculuq, abadlıq işlərinə qoşulması xəbərini eşitməkdən gözəl heç nə ola bilməz. Bir zamanlar türk dövlətlərinin birliyini arzu edirdik. İndi isə nəinki o birliyin reallaşmasını müşahidə edirik, hətta Azərbaycan üçün həssas məsələ və yer olan Qarabağda türk həmrəyliyinin təcəssümünü görürük. İyul ayında Füzulidə səfərdə olarkən Q.Berdiməhəmmədovun Qarabağda məscid tikintisi ilə bağlı təklif verməsi, Prezident İlham Əliyevin bunu məmuniyyətlə qəbul etməsi – bax budur əsl qardaşlıq nümunəsi! Avazada elan edildi ki, artıq məscidin təsviri hazırdır və yaxın zamanlarda təməli atılacaq. Bu, türkmən xalqının, Türkmənistan Liderinin Azərbaycan xalqına, Azərbaycana olan dəstəyinin nümunəsidir, bizim qardaşlığımızın təcəssümüdür.
Türk birliyi realdır, gerçəkdir və inkişafdadır. Avaza səfərində Prezident İlham Əliyev Özbəkistanın da qardaşlıq dəstəyindən söz açdı. Bəlli oldu ki, Özbəkistanın Xankəndidə açdığı tikiş fabriki şəhərin və bölgənin iqtisadi-sosial dirçəlişinə çox böyük töhfə verir. Orada yüzdən çox şəxs çalışır. Bu isə Azərbaycan üçün, Xankəndi üçün həm sözün həqiq, həm də məcazi mənasında çox böyük əhəmiyyət daşıyır. Füzulidə dahi özbək mütəfəkkiri Mirzə Uluqbəyin adını daşıyan 960 şagird yerlik orta məktəbin tikintisindən sonra bu qardaş Özbəkistanın Azərbaycan xalqına işğaldan azad edilmiş ərazilərdə göstərdiyi ikinci böyük dəstək addımıdır. Qarabağdakı tikiş fabrikində işləyən, məktəbdə təhsil alan şəxslər Özbəkistanı, onun xalqını, dahi lideri Şavkat Mirziyoyevi minnətdarlıqla yad edir.
Azərbaycan, Cənubi Qafqaz, Mərkəzi Asiya və dünya üç liderin tarixi görüşünə, sammitinə şahidlik etdi. Türk Birliyinə gedən yolu daha da sürətli şəkildə keçmək üçün bu formatda – ikili, üçlü çalışmalara çox ciddi ehtiyac var. Bu cür çalışmalar Türk Dövlətləri Təşkilatını daha da gücləndirən amildir. Bu prosesdə Azərbaycan Prezidenti İlham Əliyevin liderlik və birləşdiricilik qabiliyyəti Türk Dünyasını daha da gücləndirir.
Bu səfərin müsbət nəticələri mütləq olacaq. Artıq müvafiq dövlət qurumlarına göstərişlər verilib ki, üçtərəfli əməkdaşlıq formatı yaradılsın və liderlərin növbəti görüşünə konkret istiqamətlər üzrə təkliflər verilsin. Nəqliyyat, tranzit, logistika, elektroenergetika, neft, qaz sahələri və mədəni əlaqələr istiqamətində tərəflərin birgə çalışmaq üçün ortaya qoyduğu ciddi çalışmalar var. Sadalanan bütün bu sahələr üçtərəfli əməkdaşlığı və birliyi daha da gücləndirəcək. Bu isə öz növbəsində Türk Dövlətləri Təşkilatını gücləndirəcək, bu məsələlərə seyrçi mövqedə dayanan Türkmənistanın TDT ilə sıx işbirliyinə, gələcək perspektivdə üzvlüyünə aparıb çıxara biləcək.
Həqiqətən Prezident İlham Əliyevin Türkmənistan səfəri tarixi bir gün oldu. Bu bizim bölgəmizdə yeni, çox perspektivli, sülhə və tərəfdaşlığa yönəlmiş əməkdaşlıq formatını yaratdı. Dövlətlərimizə, bölgmizə, türk birliyinə və dünyamıza xeyirli-uğurlu olsun!
22:15 24.08.2025
Oxunuş sayı: 11290
Mübariz Göyüşlü
Cross Media Təhlil Mərkəzinin analitiki, Crossmedia.az Analitik İnformasiya Portalının Baş redaktoru
