Məlumatlar sızdı, Netanyahunun planları üzə çıxdı: Yaxın Şərqdə müharibə genişlənə bilər
"Ynet" portalına Baş nazir Benyamin Netanyahunun komandasında təmsil olunan yüksək rütbəli rəsmilərə istinadən bildirib ki, İsrail hökuməti Qəzza zolağının tam işğalı planlarını təsdiqləməyə hazırlaşır.
"Biz Qəzza zolağının tam işğalına doğru irəliləyirik", - deyə onlar bildirib.
Nəşr qeyd edir ki, İsrail hərbi rəhbərliyi, o cümlədən İsrail Silahlı Qüvvələrinin Baş Qərargah rəisi Eyal Zamir belə bir qərarın əleyhinədir.
"Döyüş əməliyyatları hətta girovların saxlanıldığı ərazilərdə aparılacaq. Əgər bu, Baş Qərargah rəisinə uyğun gəlmirsə, o, istefa verə bilər", - rəsmilərdən biri deyib.
Portalın məlumatına görə, Netanyahu tezliklə Nazirlər Kabinetinə orduya Qəzzanı tamamilə işğal etmək əmrinin verilməsi təklifini təqdim edə bilər.
Səslənən iddialar reallaşarsa, deməli, perspektivdə müharibə uzanacaq və daha da gərginləşəcək. Təl- Əviv buna hazırdırmı?
Bu barədə Crossmedia.az-a açıqlama verən politoloq Oqtay Qasımov hazırda İsrail hakimiyyətində iki baxışın olduğunu və bunun hakimiyyətdə ciddi fikir ayrılıqları yaratdığını qeyd edib: “Öncə onu qeyd elmək lazımdır ki, İsrailin hazırki hökumətinin niyyəti ümumiyyətlə, Qəzzanı tam şəkildə işğal etməkdir. Amma bu siyasət də əvvəlki hökumətlərin siyasətindən ciddi şəkildə fərqlənir. Xatırlatmaq yerinə düşər ki, hələ doxsanıncı illərdə İsrailin keçmiş baş naziri İshaq Qrabin o zamankı Fələstin rəhbəri Yaser Ər-Əfad arasında razılaşmalarda iki dövlətli həll modeli nəzərdə tutulurdu. Bir çox detallar müzakirə olunmuşdu və məhz ona görə də o vaxt İshaq Qrabin Nobel mükafatına layiq görülmüşdü. O zaman keçmişbaş nazirə sui-qəsd edən heyətin tərkibində olan şəxslərdən biri hazırda İsrailin təhlükəsizlik naziridir. Bunu nəzərə almaq lazımdır. Yəni ifrat sağçı bir siyasi qüvvə hakimiyyətdədir. Qəzzada da hazırda böyük bir qətliam yaşanır. Eyni zamanda bir humanitar böhran yaşanmaqdadır. Məhz bu səbəbdən də Avropanın böyük dövlətləri Böyük Britaniya, Fransa, Almaniya İsraili xəbərdar eləyiblər və bildirirlər ki, Qəzzada bu humanitar böhran dayanmazsa, Fələstini tanınması ilə bağlı prosedurları həyata keçirəcəklər".
Onun sözlərinə görə, hazırda İsraildə Fələstinlə bağlı iki yanaşma var: "Bunlardan biri qeyd elədiyimiz kimi, hakimiyyətdə olan qüvvələrin baxışıdır. Onlar ifrat sağçılığı təmsil eləyirlər. Hazırda onların siyasəti regionda ciddi problemlər yaratmaqdadır. Regionun bir çox dövləti ilə münasibətlərdə ciddi sıxıntılar yaşanır.
Onu da deyim ki, son zamanlar İstail mətbuatında Türkiyə və Şimali Kiprlə bağlı dərc olunan yazılar təxribatçı xarakterlidir. Bu da bölgədə gərginliyi artıran məsələdir. Amma nəzərə alsaq ki, beş yüzlə yaxın təhlükəsizlik işçisi də ABŞ Prezidentə Donald Trampa müraciət eləyiblər. Bu, o deməkdir ki, İsrailin müxalifəti də Qəzzada aparılan bu siyasətdən məmnun deyil. Narazılıq ifadə olunur və keçmiş baş nazir, hazırda müxalifətdə olan Yair Lapid iki gün öncə bildirdi ki, Qəzzadakı əməliyyatlar, ümumiyyətlə regiondakı gərginlik Netanyahunun birbaşa özünün siyası maraqları, şəxsi maraqları ilə bağlı olan məsələdir. Bu, İsrailin maraqları ilə uzlaşmır. Yəni bu baxımdan götürdükdə elitada da parçalanma var və doğrudan da, Netanyahunun bu savaşı davam etdirməsi bir formada həm də onun özü siyasi karyerası ilə bağlıdır”.
Politoloq, həmçinin faktiki hakimiyyətə qarşı ciddi narazılıqların olduğunu da bildirib: "Qəzzada hadisələr başlamazdan öncə İsraildə davamlı şəkildə etiraz yürüşləri və nümayişləri, o cümlədə mitinqlər keçirilirdi. Netanyahunun hüquq sahəsində məhkəmələrlə bağlı apardığı siyasətdən narazılıq ifadə olunurdu və Netanyahunun özü korrupsiya əməlləri ilə bağlı vaxtilə istintaqa cəlb olunmuşdu. Yəni bunlar hamısı bir formada hökumətin siyasətinə təsir eləyən amillərdən biridir. Çünki savaş dayanacaqssa, İsrail cəmiyyətində bu savaşla bağlı xeyli suallar ortaya çıxacaq və hökumət bunlara cavab vermək durumunda olacaq. Bu baxımdan İsraildə fikir ayrılıqları ciddi şəkildə dərinləşir".
Müsahibimizn sözlərinə görə, ABŞ Netanyahunu bir formada təşviq eləyə bilsələr, təzyiq eləyə bilsələr ki, Qəzzadakı proseslər dayansın, onda müəyyən nəticə əldə etmək olar: "Hərçənd, məncə, bu ehtimal da azdır. Çünki Netanyahu öz istəklərinə nail olmayana qədər çalışacaq ki, bu savaşı davam elətdirsin”.
Elmir Heydərli
16:25 05.08.2025
Oxunuş sayı: 1145
