ETİ: Azərbaycanda taxıl sahələrinin 60 %-i yerli sortlarla əkilib
Bu
mövsüm Azərbaycanda ümumilikdə 986 min hektar sahədə taxıl əkilib və həmin sahələrin
təxminən 60 %-ində Kənd Təsərrüfatı Nazirliyinin Əkinçilik Elmi-Tədqiqat
İnstitutunun (ETİ) alimləri tərəfindən yaradılmış yerli sortlardan istifadə
olunub.
Crossmedia.az
xəbər verir ki, bu barədə ETİ-nin direktoru Faiq Xudayev məlumat verib.
O
bildirib ki, taxılçılıqda yüksək məhsuldarlığa nail olmaq üçün ilk və ən vacib
mərhələ düzgün toxum seçimi ilə bağlıdır:
“Hazırda
institut tərəfindən ölkənin müxtəlif bölgələrinin torpaq-iqlim şəraitinə uyğun,
biotik amillərə davamlı və adaptiv xüsusiyyətlərə malik yeni sortların
yaradılması istiqamətində seleksiya tədqiqatları aparılır”.
F.
Xudayevin sözlərinə görə, aqrar sahə də qloballaşan dünyanın yaratdığı yeni
çağırışlarla üz-üzədir: “Buna görə də həm mövcud, həm də gələcək tələblərə
cavab verən, daha dayanıqlı və məhsuldar sortların yaradılmasına ehtiyac var.
Azərbaycanda əkin sahələrinin əksəriyyəti ya dəmyə, ya da məhdud suvarma şəraitində
yerləşir. Belə şəraitdə yüksək məhsuldarlığa nail olmaq üçün müasir
texnologiyaların tətbiqi və sürətli seleksiya metodları xüsusi önəm daşıyır”.
O
qeyd edib ki, ənənəvi seleksiya üsulları ilə yeni sortun yaradılması təxminən
15 il çəkir və bu, sürətlə dəyişən dövrün tələblərinə cavab vermir: “Bu səbəbdən
institut qarşıya məqsəd qoyub ki, klassik metodlardan genetik səviyyədə tədqiqatlara
və sürətli seleksiya texnologiyalarına keçid etsin. Hibridləşmə yolu ilə bir
ildə 6 nəsil əldə etmək mümkündür və bu yanaşma ilə yeni sortların 5-6 il ərzində
yaradılması nəzərdə tutulur”.
ETİ-nin
direktoru əlavə edib ki, bu yanaşma həm elmi effektivliyi artıracaq, həm də
fermerlər və digər sifarişçilərin artan tələblərinə daha çevik cavab verilməsinə
şərait yaradacaq.
14:43 05.08.2025
Oxunuş sayı: 610
