Şəkidə “Qərbi Azərbaycan irsi” kitabının birinci cildinin təqdimatı olub
İyulun 16-da Şəki Şəhər İcra Hakimiyyətinin təşkilatçılığı ilə şəhər Heydər Əliyev Mərkəzində “Qərbi Azərbaycan irsi: Ermənistanda azərbaycanlıların maddi-mədəni irsinin – qəbiristanlıqların sistemli qaydada dağıdılmasının nəticələri və beynəlxalq hüquqi məsuliyyətə dair hesabat və materiallar” kitabının I cildinin təqdimat mərasimi keçirilib.
Crossmedia.az xəbər verir ki, tədbir iştirakçıları əvvəlcə Ümummilli Lider Heydər Əliyevin Mərkəzin qarşısında ucaldılan abidəsi önünə gül dəstələri düzərək, xatirəsini ehtiramla yad ediblər.
Tədbirin əvvəlində şəhidlərin xatirəsi bir dəqiqəlik sükutla yad olunub.
Şəki Şəhər İcra Hakimiyyətinin başçısı Elxan Usubov çıxış edərək bildirib ki, 44 günlük Vətən müharibəsində əldə olunmuş tarixi Zəfərdən sonra respublikamızın ərazi bütövlüyü və suverenliyi tam bərpa olunub, işğaldan azad olunan şəhər və kəndlərimizə keçmiş məcburi köçkünlərin qayıdışı başlanıb. Eyni zamanda, qarşımızda yeni perspektivlər açılıb. Qərbi Azərbaycanın həqiqi sahiblərinin ata-baba yurdlarına qayıdışının təməli qoyulub. Onların hüquqlarının bərpası üçün şərait yaranıb.
Qeyd olunub ki, Prezident İlham Əliyevin tövsiyəsi ilə Qərbi Azərbaycan ərazisində azərbaycanlıların tarixən yaratdığı dövlətçilik ənənələri, maddi və qeyri-maddi mədəni irsi, məruz qaldıqları tarixi ədalətsizliklər və cinayətlər haqqında davamlı tədqiqatlar aparılır.
Bu istiqamətdə müasir elmi yanaşmalara uyğun yeni araşdırma aparılıb və “Qərbi Azərbaycan irsi” kitabının birinci cildi hazırlanaraq çap olunub. İcra başçısı vurğulayıb ki, bu kitab gələcək nəsillərin yaddaşında Qərbi Azərbaycanın zəngin irsini yaşatmağa xidmət edəcək.
Tədbirdə Qərbi Azərbaycan İcması Aparatının elmi işçisi Şəmsi Qocayev, Şəki Rayon Ağsaqqallar Şurasının sədri Vaqif Əhmədov, Şəki Regional Elmi Mərkəzin şöbə müdiri, tarix üzrə fəlsəfə doktoru Rahim Həsənov, Şəki kənd sakini, təqaüdçü Əli Hüseynov çıxış edərək, Qərbi azərbaycanlıların məruz qaldığı tarixi ədalətsizlikdən bəhs edib, kitabın əhəmiyyətindən söz açıblar.
Qeyd olunub ki, kitabın I cildində 1991-ci ilə qədər Qərbi Azərbaycan – indiki Ermənistan ərazisində mövcud olmuş, indi isə yalnız xarabalıqları qalmış 700-dən çox azərbaycanlı qəbiristanlığının 201-nin əvvəlki və hazırkı vəziyyətindən bəhs edilir.
İki hissədən ibarət olan kitabın birinci hissəsində hesabatın məqsədi və tədqiqatın predmeti müəyyən edilir, metodologiyasından bəhs olunur. İkinci hissədə isə Qərbi Azərbaycanın hər bir rayonu üzrə qruplaşdırılmış qəbiristanlıqların yerləşdiyi kəndlərin tarixi inkişafı, demoqrafik göstəriciləri, kəndlə bağlı toponimik və inzibati dəyişikliklər, əhalinin köç və deportasiya prosesi, qəbiristanlıq və digər mədəni irs obyektlərinin mövcud vəziyyəti sistemli şəkildə təqdim edili
r.
Tədbirin sonunda “Qərbi Azərbaycan irsi” silsilə nəşri ilə bağlı hazırlanmış sənədli videoçarx nümayiş olunub.
Qeyd edək ki, kitabın müəllifləri Qərbi Azərbaycan İcmasının İdarə Heyətinin sədri, Milli Məclisin deputatı Əziz Ələkbərli və tədqiqatçı-alim Səbuhi Hüseynovdur.
(AZƏRTAC)
02:58 17.07.2025
Oxunuş sayı: 1121
