Azərbaycan və Qazaxıstan orduları döyüş sınağında bir arada
Azərbaycan və Qazaxıstan hərbçilərinin iştirakı ilə keçirilən “Tərlan-2025” birgə təlimləri iki ölkə arasında hərbi əməkdaşlığın güclənməsinin bariz nümunəsidir. Bu cür təlimlər regional təhlükəsizlik, qarşılıqlı operativ hazırlıq və təcrübə mübadiləsi baxımından mühüm əhəmiyyət daşıyır. Strateji baxımdan, Orta Asiya və Cənubi Qafqazda sabitliyin təmin olunmasına, eləcə də türk dövlətləri arasında hərbi inteqrasiyanın möhkəmlənməsinə töhfə verir. Bu təlim həm də tərəfdaşlıq çərçivəsində müasir döyüş hazırlığının və koordinasiyanın sınaqdan keçirilməsi baxımından önəmlidir.
Mövzu ilə bağlı hərbi ekspert Emil Həsənli Crossmedia.az-a açıqlama verib.
Hərbi ekspert Emil Həsənli Azərbaycan və Qazaxıstanın strateji və qardaşlıq münasibətlərindən danışıb: "Qazaxıstanla Azərbaycan müttəfiq dövlətlərdir. Həm də qardaş dövlətlərdir. Eyni dili, eyni dini paylaşırlar. İkisi də Xəzər sahilində yerləşir. Ərazicə və regionca da bir-birinə yaxın dövlətdir. Xəzər regionunu paylaşırlar. Bizim Xəzər qonşumuzdur. Ondan sonra Qazaxıstanla biz Türk Dövlətlər Təşkilatında, İslam Əməkdaşlıq Təşkilatında, bir çox təşkilatlarda bir yerdəyik. Xüsusən Türk Dövlətləri Təşkilatı çox zaman daha sıx inteqrasiyaya yönəlir və yaxınlarda “Turan birliyi”, “Turan ordusu”nun yaradılması ideyası gündəmə gəlib. Bu, qardaş ölkələrin birgə ordularının yaradılması məsələsini gündəmə gətirir. Birgə təlimlərin də ən böyük əhəmiyyəti ondan ibarətdir ki, bu ölkələrin bir-birinə və ya regionda bu dövlətlərin maraqları olan yerdə hər hansısa bir problem yaranarsa, bu dövlətlər bir-birilərinə kömək etsinlər. Eyni zamanda təcrübə mübadiləsi həyata keçirilsin".
E.Həsənli qeyd edib ki, ən son müharibələrdən biri Azərbaycanda baş verib və Azərbaycan müharibə təcrübələrini qardaş-dost ölkələrlə paylaşıb: "Bilirsiniz ki, Azərbaycanın 44 günlük müharibədə və bir günlük antiterror tədbirlərində çox böyük təcrübəsi var. Bu təcrübəni qardaş-dost ölkələrlə paylaşır. Müasir ordu anlayışı, müasir müharibə təcrübəsi baxımından, ən son müharibələrdən biri Azərbaycanda baş verib. Və Azərbaycan bu müharibədə böyük qələbə qazanıb. Azərbaycandan sonra həm Rus-Ukrayna müharibəsi, həm İsrail-İran qarşıdurması, həm də Pakistan-Hindistan arasında toqquşmalar olub. Amma onların heç birində konkret nəticə əldə edilməyib. Halbuki Azərbaycan İkinci Qarabağ müharibəsindən sonra çox qısa müddətdə konkret nəticə əldə edib – ərazi bütövlüyünü və suverenliyini tam bərpa edib. Bu baxımdan Azərbaycan Ordusunun çox böyük təcrübəsi və zəfər nümunəsi var. Bu təcrübənin qardaş və dost ölkələrlə bölüşülməsi Azərbaycanın milli maraqlarına uyğun olduğu kimi, həmin dövlətlərin, onların ordularının möhkəmlənməsi və güclənməsi baxımından da çox önəmlidir".
Emil Həsənli birgə təlimlərin mahiyyətindən və ordunun döyüş qabiliyyətinin sınağından söz açıb: "Təlimlər döyüşdən sonra ordunun gücünün və hazırlıq səviyyəsinin ən mühüm sınağıdır. Bu həm döyüş qabiliyyətinin, həm də mənəvi-psixoloji hazırlığın yoxlanılması baxımından önəmlidir. Ordunun döyüşə hərtərəfli hazırlığı üçün təlimlər imtahan xarakteri daşıyır. Təlimlərdən əvvəl əsgərlər fərdi hazırlıqdan keçirlər, daha sonra hərbi hissə, tabur, tağım, bölük, korpus səviyyəsində hazırlıqlar həyata keçirilir. Bu mərhələlərdə hərbiçilərin bilik və bacarıqları yoxlanılır. Təlimlər zamanı isə əldə edilən nəzəri biliklərin praktik şəkildə mənimsənilməsi, eyni zamanda zamana, məkana, coğrafi mövqeyə uyğun olaraq necə tətbiq edilməsi yoxlanılır. Yəni təlimlər həm biliklərin tətbiq sınağı, həm də ordunun real döyüş vəziyyətinə hazırlığının əsas göstəricisidir".
Fatimə Nəbiyeva
16:45 09.07.2025
Oxunuş sayı: 5289
